Hár qanday rawajlanıwdıń tamırına balta uratuǵın illetlerdiń biri korrupciya bolıp esaplanadı. Elimizde usınday illetlerge qarsı gúresiw, olardıń aldın alıw máselesine ayrıqsha itibar qaratılıp, bul baǵdardaǵı nızamshılıq bazası da jetilistirilmekte. Usı tiykarda puqaralardıń juwapkershiligi de arttırılmaqta.

Usıǵan qaramastan, elimizdegi kópshilik tarawlarda, sonıń ishinde, joqarı bilimlendiriw sistemasında korrupciyalıq jaǵdaylardıń ushırasıp turǵanı bar haqıyqat.

Ájiniyaz atındaǵı Nókis mámleketlik pedagogikalıq institutında «Biz – korrupciyaǵa qarsımız!» atamasındaǵı ushırasıw tarawda korrupciyalıq háreketlerdiń aldın alıw máselesine baǵıshlandı.

Ilajǵa Ámir Temur atındaǵı Ózbekstan Respublikası Mámleketlik qáwipsizlik xızmeti akademiyasınıń professor-oqıtıwshıları, instituttıń basshı hám pedagog xızmetkerleri, student-jaslar qatnastı.

Ushırasıwda sózge shıqqanlar elimizde jámiyetlik-siyasiy, social-ekonomikalıq tarawlardıń rawajlanıwına keri tásir etip atırǵan korrupciyalıq háreketlerdiń aldın alıw maqsetinde 2017-jıl 3-yanvarda qabıl etilgen «Korrupciyaǵa qarsı gúresiw haqqında»ǵı, sonday-aq, Prezidentimiz tárepinen usı jıldıń 5-iyun kúni tastıyıqlanǵan «Mápler soqlıǵısıwı haqqında»ǵı Ózbekstan Respublikasınıń nızamları, olardan kelip shıǵıp tarawlarda, ásirese, bilimlendiriw tarawındaǵı usınday háreketlerdiń aldın alıw boyınsha ámelge asırılıp atırǵan jumıslar, aldaǵı wazıypalarǵa toqtalıp ótti.

Korrupciyaǵa qarsı gúresiw elimizde Prezidentimiz Sh.Mirziyoyevtiń basshılıǵında mámleketlik siyasattıń tiykarǵı baǵdarlarınıń biri sıpatında belgilep berilgen bolıp, bunda eń áhmiyetli ilajlardıń biri – xalıqtıń huqıqıy sawatlılıǵı hám bilimlerin arttırıw ekenligi atap ótilgen edi.

Ámelge asırılıp atırǵan usınday jumıslarǵa qaramastan, tarawlarda korrupciyalıq háreketler anıqlanıp, olarǵa nızamlı sharalar kórilmekte.

Joqarı bilimlendiriwde korrupciyalıq háreketlerdiń aldın alıw ushın maǵlıwmatlardı alıw elektron, hújjet tapsırıw onlayn formatlarǵa ótkerilip, házirgi waqıtta imtixanlardı onlayn tárizde Internet tarmaqları arqalı ashıq-aydın ótkeriw jolǵa qoyılǵanlıǵı, sonday-aq, eń áhmiyetlisi, hár bir joqarı oqıw orınlarında korrupciyaǵa qarsı gúresiw maqsetinde komplaens-qadaǵalaw bólimi shólkemlestirilip, bul baǵdardaǵı anıq jumıslar belgilengenligi sóz etildi.

Ilajda dámegóylik, para alıw hám beriw, belgili bir sawǵa esesine adamlardıń huqıq hám máplerine qarsı háreket etiw ámeldegi nızamshılıq tiykarında qadaǵan etiletuǵınlıǵı, eger usınday jaǵdaylar anıqlanatuǵın bolsa, jınayıy juwapkershilikke tiykar bolatuǵınlıǵı anıq mısallar menen atap ótildi.

Ushırasıwda student-jaslar ózlerin qızıqtırǵan sorawlarǵa juwap aldı.

NMPI baspasóz xızmeti.