Búgin, 10-aprel kúni paytaxtımız Nókis qalasında qaraqalpaq klassikalıq ádebiyatınıń kórnekli wákili, ullı shayır Ájiniyaz Qosıbay ulınıń esteligine gúlsheńberler qoyıldı.

Ilajǵa Qaraqalpaqstan Respublikası Joqarǵı Keńesi hám Ministrler Keńesi, Qaraqalpaqstan Jazıwshılar awqamınıń wákilleri, Ájiniyaz atındaǵı Nókis mámleketlik pedagogikalıq institutınıń professor-oqıtıwshıları, ádebiyattanıwshı ilimpazlar hám student-jaslar qatnastı.

Jazıwshı hám shayırlar, ilimpazlar jaslarǵa Ájiniyaz shayırdıń ómiri, dóretiwshiligi, shıǵarmalarınıń tek ǵana qaraqalpaq ádebiyatı emes, sonıń menen birge, shıǵıs xalıqları ádebiyatında tutqan ornı, dóretiwshiliginiń ózine tán ózgeshelikleri hám onıń izertleniwi haqqında maǵlıwmatlar berdi.

Ótken jılı shayırdıń 200 jıllıǵı múnásibeti menen xalıqaralıq hám respublikalıq kólemde ótkerilgen mádeniy-aǵartıwshılıq ilajlarınıń áhmiyeti tuwralı pikir almasıldı.

Instituttıń student-jasları Ájiniyaz shayır qosıqlarınan úzindiler, elimizdiń belgili dóretiwshileri shayırdıń esteligine arnap jazǵan qosıqların oqıdı.

Institutta Ájiniyaz Qosıbay ulınıń tuwılǵan kúnine arnalǵan ilajlar dawam etpekte.

NMPI baspasóz xızmeti.