Ájiniyaz atındaǵı Nókis mámleketlik pedagogikalıq institutı Tábiyiy pánler fakultetiniń jámááti hám belsendi student-jasları qatnasıwında Aral teńiziniń qurıǵan ultanında «jasıl qaplamalar» payda etiw maqsetinde ekologiyalıq akciya shólkemlestirildi.

«Jasıl mákan» ulıwma milliy joybarı hám Ózbekstan kásiplik awqamları Federaciyasınıń dúzilgenine 120 jıl tolıwı múnásibeti menen ótkerilgen ilajda jaslar ustazları menen birgelikte shólge shıdamlı seksewil nállerin otırǵızıp, teńiz túbin kógallandırıwǵa ózleriniń úleslerin qostı.

Sonday-aq, ilaj sheńberinde qatnasıwshılar «Aral teńizi tariyxı» muzeyinde bolıp, teńizdiń ótmishi, házirgi waqıtta ekologiyalıq turaqlılıqtı saqlap qalıw ushın ámelge asırılıp atırǵan jumıslar haqqında maǵlıwmatlarǵa iye boldı.

Maǵlıwmat ornında atap ótiw kerek, Aral teńiziniń qurıǵan ultanında «jasıl qaplamalar» payda etiw jumısları Prezidentimizdiń baslaması menen 2018-jıldan berli turaqlı dawam etip kiyatırǵan bolıp, aymaqtaǵı ekologiyalıq jaǵdaydı jaqsılaw, zıyanlı duz hám shańlardıń kóteriliwiniń aldın alıw maqsetinde ámelge asırılıp atırǵan jasıllandırıw ilajlarına institut jámááti de múnásip úleslerin qosıp kelmekte.

NMPI baspasóz xızmeti.