Búgin, 12-aprel kúni Ájiniyaz atındaǵı Nókis mámleketlik pedagogikalıq institutında Respublikalıq Ruwxıylıq hám aǵartıwshılıq orayınıń baslıǵı Otabek Hasanov Qaraqalpaqstan Respublikasınıń ziyalıları hám kórkem óner ǵayratkerleri menen ushırastı.

Ilajǵa Qaraqalpaqstan Respublikası Joqarǵı Keńesi Baslıǵınıń orınbasarı Rustam Saparbaev, oraydıń Qaraqalpaqstan Respublikası bólimi baslıǵı Tatlımurat Atamuratov, ministrlik hám shólkemler, joqarı oqıw orınlarınıń basshıları, belgili jazıwshı hám shayırlar, kórkem óner ǵayratkerleri qatnastı.

Ushırasıwda jámiyettiń ruwxıy dúnyasın bayıtıw, mádeniy miyrastı qásterlep-saqlaw hám jas áwladtıń tárbiyasındaǵı juwapkershilikti kúsheytiwge baylanıslı birneshe áhmiyetli máseleler dodalandı.

Ushırasıwda Otabek Hasanov házirgi dáwir talaplarına sáykes túrde ruwxıy hám mádeniy jumıslardıń nátiyjeliligin arttırıw, xalqımız, ásirese, jaslar arasında kitapqumarlıq mádeniyatın kúsheytiw, milliy qádiriyatlardı úgit-násiyatlawdıń jańa usılları haqqında aytıp ótti.

Ziyalılar hám kórkem óner ǵayratkerleri zamanagóy kórkem óner baǵdarları arqalı jaslardıń jámiyetlik belsendiligin arttırıw, teatr, muzıka hám súwretlew óneri tarawında milliy dástúrlerdi innovaciyalıq ideyalar menen bayıtıw, media hám internet platformalarında milliy qádiriyatlardı keń en jaydırıw, jas dóretiwshiler menen qábiletli kórkem óner sheberlerin qollap-quwatlaw mexanizmlerin jetilistiriw sıyaqlı máseleler boyınsha óz pikir hám usınısların bildirdi.

Ushırasıwda kóterilgen máseleler boyınsha aldaǵı waqıtta birgelikte ámelge asırılatuǵın wazıypalar belgilep alındı.

NMPI baspasóz xızmeti.