Ájiniyaz atındaǵı Nókis mámleketlik pedagogikalıq institutı Tariyx fakulteti geografiyanı oqıtıw metodikası kafedrası tárepinen «Ózbekstan Respublikası aymaqların turaqlı rawajlandırıwdıń geografiyalıq tiykarları» atamasındaǵı respublikalıq ilimiy-teoriyalıq konferenciya shólkemlestirildi.

Konferenciyanıń ashılıw plenar májilisinde instituttıń ilimiy-izertlew hám pedagog kadrlardı qayta tayarlaw bóliminiń baslıǵı A.Allamuratov sózge shıǵıp, ilajdıń áhmiyeti, maqseti, wazıypaları haqqında aytıp ótti hám konferenciya jumısına tabıslar tiledi.

Ilajda Jizzaq mámleketlik pedagogikalıq universiteti, Qaraqalpaq mámleketlik universiteti, Qaraqalpaqstan Respublikası pedagoglardı qayta tayarlaw orayı, sonday-aq, institut professor-oqıtıwshıları, ilimpazlar, doktorantlar óz bayanatları menen qatnastı.

Konferenciya tábiyiy geografiya hám geoekologiya máseleleri, ekonomikalıq-sociallıq geografiya hám demografiyanıń áhmiyetli mashqalaları, geografiya hám onı oqıtıwda innovaciyalıq texnologiyalardan paydalanıw usılları sekciyaları boyınsha óz jumısın dawam ettirdi.

Konferenciyaǵa respublikamızdıń túrli aymaqlarındaǵı joqarı oqıw orınları, ilimiy-izertlew oraylarınıń professor-oqıtıwshıları, izleniwshiler, doktorantlar, magistrantlar hám studentlerden ulıwma 83 ilimiy maqala kelip tústi. Belsene qatnasqanlar estelik sawǵaları hám húrmet jarlıǵı menen sıylıqlandı.

Azamat Jaqsımuratov,
NMPI geografiya hám ekonomikalıq bilim tiykarları tálim baǵdarınıń 3-kurs studenti.