Ájiniyaz atındaǵı Nókis mámleketlik pedagogikalıq institutında Ózbekstan «Adolat» social-demokratiyalıq partiyası Qaraqalpaqstan Respublikası Keńesi menen birgelikte korrupciyanıń aldın alıw hám oǵan qarsı gúresiw máselelerine arnalǵan ushırasıw shólkemlestirildi.

Ushırasıwda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov sońǵı jıllarda elimizde korrupciyaǵa qarsı gúresiw hám onıń aldın alıw máselesine ayrıqsha itibar qaratılıp, bul baǵdardaǵı nızamshılıq bazası da jetilistirilgenligi, usı tiykarda puqaralardıń juwapkershiligi de arttırılıp atırǵanlıǵın atap ótti.

Ilajda partiyanıń Qaraqalpaqstan Respublikası Keńesi baslıǵı Nurlıbay Qayıpbergenov, Qaraqalpaqstan Respublikası Ádillik ministrligi huqıqıy málimleme sektorınıń baslıǵı Nuriya Berdiniyazova, instituttıń Baslawısh tálim fakulteti dekanı, partiyanıń «Hayal-qızlar qanatı» baslıǵı Ulbosın Seytjanova, korrupciyaǵa qarsı gúresiw «Komplaens-qadaǵalaw» sistemasın basqarıw bóliminiń bas qánigesi Gúlistan Dálibaeva elimizde jámiyetlik-siyasiy, social-ekonomikalıq tarawlardıń rawajlanıwına keri tásir etip atırǵan korrupciyalıq háreketlerdiń aldın alıw maqsetinde 2017-jıl 3-yanvarda qabıl etilgen «Korrupciyaǵa qarsı gúresiw haqqında»ǵı Ózbekstan Respublikasınıń nızamı hám onnan kelip shıǵıp tarawlarda, ásirese, bilimlendiriw tarawındaǵı usınday háreketlerdiń aldın alıw boyınsha ámelge asırılıp atırǵan jumıslar, aldaǵı wazıypalarǵa toqtalıp ótti.

Korrupciyaǵa qarsı gúresiw elimizde Prezidentimiz Sh.Mirziyoyevtiń basshılıǵında mámleketlik siyasattıń tiykarǵı baǵdarlarınıń biri sıpatında belgilep berilgen bolıp, bunda eń áhmiyetli ilajlardıń biri – xalıqtıń huqıqıy sawatlılıǵı hám bilimlerin arttırıw bolıp tabıladı.

Ilajda dámegóylik, para alıw hám beriw, belgili bir sawǵa esesine adamlardıń huqıq hám máplerine qarsı háreket etiw ámeldegi nızamshılıq tiykarında qadaǵan etiletuǵınlıǵı, eger usınday jaǵdaylar anıqlanatuǵın bolsa, jınayıy juwapkershilikke tiykar bolatuǵınlıǵı anıq mısallar menen atap ótildi.

Ushırasıw óz ara pikir almasıwlar menen dawam etti.

NMPI baspasóz xızmeti.