Usı jıldıń 13-18-aprel kúnleri aralıǵında Túrkmenstan Respublikasınıń Ashxabad qalasında matematika páninen «Open Mathematical Olympiad for University Students (OMOUS-2025)» dástúriy xalıqaralıq olimpiadası bolıp ótti.

Xalıqaralıq pán olimpiadasına dúnyanıń kóplegen mámleketlerindegi joqarı oqıw orınlarınıń studentleri, sonıń ishinde, Ájiniyaz atındaǵı Nókis mámleketlik pedagogikalıq institutınıń student-jasları da qatnastı.

Quwanıshlı tárepi, xalıqaralıq pán olimpiadasında institutımızdıń Fizika-matematika fakultetiniń studentleri Umida Maxsutova hám Maman Genjaliev sıylı 3-orındı iyelep, bronza medalın qolǵa kirgizdi.

– Studentlerimiz xalıqaralıq sheńberde shólkemlestirilgen pán olimpiadasında ustazlarınan úyrengen bilim hám kónlikpelerin kórsetip, joqarı nátiyjelerge eristi. Álbette, bul institutımızda qábiletli jaslardı qollap-quwatlaw baǵdarındaǵı alıp barılıp atırǵan úlgili jumıslardıń nátiyjesi dep esaplaymız, – deydi Fizika-matematika fakultetiniń dekanı Rzamurat Jiyemuratov.

Institutımız studentleri Umida Maxsutova hám Maman Genjalievtiń xalıqaralıq dárejede ótkerilgen pán olimpiadasında qolǵa kirgizgen joqarı nátiyjeleri menen jaslarımız jáne olardıń ustazların institut rektoratı hám jámááti atınan qızǵın qutlıqlaymız!

NMPI baspasóz xızmeti.