Aldın xabar bergenimizdey, Ózbekstan Respublikası Ministrler Kabinetiniń tiyisli qararları tiykarında elimizdiń barlıq aymaqlarında usı jıldıń 21-27-aprel kúnleri aralıǵında «Ózbekstan – kitapqumarlar jurtı» súreni tiykarında Respublikalıq «Kitapqumarlıq hápteligi» ilajları shólkemlestirilmekte.

Búgin, 22-aprel kúni Ájiniyaz atındaǵı Nókis mámleketlik pedagogikalıq institutı málimleme-resurs orayında «Kitapqumarlıq hápteligi» sheńberinde «Ájiniyaz – qaraqalpaq poeziyasınıń gúltajı» atamasındaǵı ádebiy keshe bolıp ótti.

Ilajdı oray direktorı Gúlayım Jiyemuratova basqarıp bardı.

Keshede filologiya ilimleri boyınsha filosofiya doktorı, instituttıń qaraqalpaq ádebiyatı kafedrasınıń docenti Marat Esebaev, oraydıń sırt el málimleme-kitapxana resursları menen islesiw bóliminiń baslıǵı Rita Amanbaeva, Mektepke shekemgi tálim fakultetiniń tyutorı Gúljáhán Artikovalar shayırdıń ómiri, dóretiwshiliginiń janrlıq hám tematikalıq ózgeshelikleri, Ájiniyaz shejiresiniń izertleniwi, sonday-aq, onıń shıǵarmaların jaslarımız arasında keń túrde úgit-násiyatlaw baǵdarındaǵı jumıslar haqqında maǵlıwmatlar berdi.

Ádebiy keshe instituttıń Mektepke shekemgi tálim fakulteti hám Pedagogika fakulteti muzıkalıq tálim baǵdarınıń talantlı studentleri atqarıwındaǵı kórkem-ádebiy bólim menen dawam etti.

NMPI baspasóz xızmeti.