Mámleketimizde sońǵı jıllarda shet tillerin oqıtıw bilimlendiriw siyasatınıń baslı baǵdarı sıpatında rawajlanıp, usı baǵdarda bilimlendiriwdiń sapasın jáne tarawǵa tájiriybeli pedagoglardı biriktiriw hám xalıqtıń shet tillerin úyreniwge bolǵan qızıǵıwshılıǵın arttırıwǵa ayrıqsha dıqqat qaratılmaqta.

Ájiniyaz atındaǵı Nókis mámleketlik pedagogikalıq institutı Shet tilleri fakulteti inglis tili hám ádebiyatı kafedrası tárepinen «Jańa Ózbekstanda shet tillerin úyreniwdiń jańa múmkinshilikleri» atamasındaǵı xalıqaralıq ilimiy-teoriyalıq konferenciyada bul baǵdarda ámelge asırılıp atırǵan jumıslar keń túrde dodalandı.

Konferenciyaǵa respublikamızdıń jetekshi joqarı oqıw orınları hám ilimiy-izertlew oraylarınan professor-oqıtıwshılar, ilimpazlar menen birge, Amerika Qurama Shtatlarınan inglis tili páni oqıtıwshıları – professor Juzeppe Kyaramonte hám Xanna Lenders-Orjen, doktorantlar, magistrantlar hám student-jaslar qatnastı.

Ilajda úziliksiz bilimlendiriwdiń barlıq basqıshlarında ósip kiyatırǵan jas áwladtı shet tillerine oqıtıwdıń sapasın arttırıw, shet tillerinde erkin sóylese alatuǵın qánigelerdi tayarlaw sistemasın túp-tiykarınan jetilistiriw, usı baǵdardaǵı oqıw baǵdarlamalarınıń úziliksizligin támiyinlew, shet tillerin biliw dárejesin bahalawdıń milliy test sistemasın rawajlandırıw tiykarında qánigelik sertifikatına iye bolǵan oqıtıwshılar, studentler hám pedagoglarǵa jeńillikleri beriw jáne olardı xoshametlew baǵdarındaǵı jumıslar boyınsha bayanatlar jasaldı.

Sonıń menen birge, bayanatshılar shet tillerin oqıtıwdıń zamanagóy metodikaları, tarawdaǵı mashqalalar hám olardıń sheshimleri boyınsha tiyisli usınısların bildirdi.

Xalıqaralıq konferenciya Ózbekstanda mektepke shekemgi hám mektep bilimlendiriwinde shet tillerin oqıtıwdıń jańa múmkinshilikleri, globallıq sanlastırıw dáwirinde tillerdi úyreniwdiń tendenciyaları hám innovaciyalıq usıllar, filologiya hám awdarmashılıqtıń áhmiyetli máseleleri, mádeniyatlar aralıq baylanıs hám shet tillerin úyreniwdiń sociallıq aspektleri máselelerine arnalǵan sekciyalar boyınsha óz jumısın dawam ettirdi.

NMPI baspasóz xızmeti.