Elimizde pedagog kadrlar tayarlaw sistemasın birden-bir qatnas tiykarında túp-tiykarınan jetilistiriw, usı baǵdarda joqarı bilimlendiriw baǵdarlamaların xalıqaralıq tájiriybe tiykarında transformaciyalaw, sonday-aq, bilimlendiriw tarawında izbe-izlik hám úziliksizlikti jáne ilim hám ámeliyattıń úylesimligin támiyinlew maqsetinde 2025-jıldıń 28-aprel kúni Ózbekstan Respublikası Prezidentiniń «Pedagog kadrlar tayarlaw sistemasın bunnan bılay da jetilistiriw ilajları haqqında»ǵı Pármanı (PF-73-sanlı) qabıl etildi.

Pármanǵa muwapıq, Nizamiy atındaǵı Tashkent mámleketlik pedagogikalıq universiteti tiykarında Nizamiy atındaǵı Ózbekstan milliy pedagogikalıq universiteti shólkemlestiriledi.

Universitet respublikada pedagog kadrlar tayarlaw boyınsha jetekshi joqarı bilimlendiriw shólkemi etip belgilendi.

2025-2026-oqıw jılınan universitettiń basqarıw sisteması «Jańa Ózbekstan» universiteti tájiriybesi tiykarında túp-tiykarınan jetilistiriledi.

Universitettiń 14 fakulteti optimallastırılıp, 6 pedagogika joqarı mektebi shólkemlestiriledi.

Akademiyalıq jumıslar sanlastırılǵan basqarıw sisteması (Learning management system) arqalı jolǵa qoyıladı hám «Joqarı bilimlendiriw processlerin basqarıw» (HEMIS) málimleme sisteması menen integraciyalanadı.

Universitettiń bakalavriat tálim baǵdarlarına 1-kurstan xalıqaralıq bilimlendiriw baǵdarlamaları basqıshpa-basqısh engiziledi.

Pármannıń birinshi qosımshasına muwapıq, respublika aymaqlarındaǵı pedagogikalıq joqarı oqıw orınları, sonıń ishinde, Ájiniyaz atındaǵı Nókis mámleketlik pedagogikalıq institutı da Mektepke shekemgi hám mektep bilimlendiriwi ministrligi sistemasına ótkeriledi.

2026-2027-oqıw jılınan baslap pedagogikalıq joqarı oqıw orınlarında universitetke sáykes túrde basqarıw sisteması jetilistiriledi hám xalıqaralıq bilimlendiriw baǵdarlamaları basqıshpa-basqısh engiziledi.

NMPI baspasóz xızmeti.