Ájiniyaz atındaǵı Nókis mámleketlik pedagogikalıq institutında qaraqalpaq ádebiyatınıń qos bayteregi, Ózbekstan Qaharmanları – Ózbekstan hám Qaraqalpaqstan xalıq shayırı Ibrayım Yusupov, sonıń menen birge, Ózbekstan hám Qaraqalpaqstan xalıq jazıwshısı Tólepbergen Qayıpbergenovtıń tuwılǵanına 96 jıl tolıwına arnalǵan «Máńgi bulaqlar» atamasındaǵı respublikalıq ilimiy-teoriyalıq konferenciya shólkemlestirildi.

Konferenciyaǵa Qaraqalpaqstan xalıq shayırı Gúlistan Dáwletova, belgili shayır hám jurnalist Gúlnara Nurlepesova, dóretiwshi tulǵalardıń shańaraq aǵzaları, belgili ilimpazlar, professor-oqıtıwshılar hám studentler qatnastı.

Ilajda sózge shıqqanlar qaraqalpaq ádebiyatınıń jarqın juldızları Ibrayım Yusupov hám Tólepbergen Qayıpbergenovtıń ómiri, dóretiwshiligi, shıǵarmalarınıń úyreniliwi, sonday-aq, tek ǵana qaraqalpaq ádebiyatı emes, sonıń menen birge, túrkiy hám dúnya xalıqları ádebiyatında tutqan ornı, janrlıq-tematikalıq ózgeshelikleri haqqında maǵlıwmatlar berdi.

Konferenciyada institutta sáne múnásibeti menen ótkerilgen birqatar tańlawlardıń jeńimpazları sıylıqlandı.

Ilaj talantlı studentler atqarıwındaǵı kórkem-ádebiy bólim menen dawam etti.

NMPI baspasóz xızmeti.