Xalqımız ásirler dawamında awır sınaqlarda, basqınshı hám jawız kúshlerge qarsı mashaqatlı gúreslerde úlken mártlik hám batırlıq úlgisin ámelde kórsetip kelgen.

Ekinshi jer júzilik urısta qurban bolǵan mıńlaǵan jerleslerimizdiń jarqın esteligin eske alıw, sawash maydanlarınan aman qaytqan, front artında awır kúnlerdi sabırlılıq penen jeńgen ata-babalarımızǵa miyrim-shápáát kórsetiw shın mánisindegi milliy dástúrge aylandı.

Dúnyada millionlaǵan adamlardıń qurban bolıwına sebepshi bolǵan, misli kórilmegen joǵaltıwlar, awır aqıbetlerge alıp kelgen Ekinshi jer júzilik urıs adamzat tariyxındaǵı eń qorqınıshlı, qanlı qırǵın bolǵanlıǵı hámmemizge málim. Usı ayawsız urısta qatnasqan júz mıńlaǵan watanlaslarımızdıń atların, mártlik islerin xalqımız hesh qashan yadınan shıǵarmaydı.

Xalqımız ushın ornı tolmas joǵaltıwlarǵa alıp kelgen bul urıs dáwirinde Qaraqalpaqstan xalqınıń sanı 476 mıń adam bolǵan bolsa, urısqa 66 mıńnan aslam qaraqalpaqstanlı márt azamatlar mobilizaciyalanǵan.

1941-jılı quramında 4300 ge shamalas qaraqalpaqstanlı bolǵan 97-qaraqalpaq atqıshlar brigadası dúzildi. Bul brigadanıń batalyonları Moskva hám Stalingrad bosaǵasındaǵı hám basqa da sawashlarda qatnastı.

1941-1945-jıllar aralıǵında frontqa atlanǵan qaraqalpaqstanlı azamatlardıń 20 dan aslamı Qaharman, 6 jawınger bolsa I, II, III dárejeli «Dańq» ordenlerin alıwǵa eristi.

Sonday-aq, kóplegen jerleslerimiz Ukraina, Chexoslovakiya, Vengriya, Rumıniya, Polsha, Yugoslaviya sıyaqlı ellerdi hám Berlindi dushpanlardan azat etiwge qatnasqanı ushın sıylıqlanǵanın búgingi áwladlar bárqulla yadında saqlaydı.

Institutımız pitkeriwshisi, razvedkalıq aviaciya ushıwshısı, gvardiya aǵa leytenantı Plis Nurpeysovqa fashizm ústinen erisilgen jeńiske qosqan múnásip úlesi ushın Qaharman ataǵınıń berilgeni jaslarımızdı Watanǵa sadıqlıq hám pidayılıq ruwxında tárbiyalaw baǵdarındaǵı maqtanısh penen tilge alatuǵın mártlik úlgisi bolıp tabıladı.

Búgingidey tınısh-paraxat, abadan turmısımızdıń tiykarshıları esaplanǵan ata-babalarımızdıń esteligine joqarı húrmet kórsetiw – hár birimizdiń azamatlıq wazıypamız.

Solay eken, 9-may – Eslew hám qádirlew kúni ulıwma xalıqlıq bayramı menen siz, áziz xalqımızdı institutımız rektoratı hám miynet jámááti atınan shın júrekten qutlıqlayman.

Ilayım, elimiz tınısh, aspanımız ashıq, xalqımızdıń turmısı abadan bolǵay!

Quvondiq Qodirov,

Ájiniyaz atındaǵı Nókis mámleketlik pedagogikalıq institutınıń rektorı.