9-may – Eslew hám qádirlew kúni qarsańında Ájiniyaz atındaǵı Nókis mámleketlik pedagogikalıq institutı rektorı Quvondiq Qodirov hám institut jámiyetlik keńesi, jaslar awqamı baslanǵısh shólkemi wákilleri paytaxtımız Nókis qalasında jasaytuǵın Ekinshi jer júzilik urıs qatnasıwshısı Qádirbay ata Narmanovtıń shańaraǵına barıp, onıń halınan xabar aldı.

Bıyıl júz benen júzlesip atırǵan Qádirbay ata Narmanov áyne kúsh-jigerge tolı jigitlik dáwirinde fashizmge qarsı gúreske atlanıp, elimizdi dushpannan qorǵawǵa múnásip azamatlıq úlesin qostı. Ol urıstan keyingi jıllarda da mámleketimizdiń hár tárepleme qayta tiklenip, rawajlanıwı ushın pidayılıq penen xızmet etti.

Qádirbay ata urıs jıllarındaǵı qıyınshılıqlar, xalıqtıń awır turmısı haqqında aytıp berdi. Búgingidey tınısh hám abadan turmısqa erisiw ańsatlıq penen bolmaǵanlıǵın, neshshe mıńlaǵan adamlar bunıń ushın janın qurban etkenligin ayta kelip, álbette, hár birimiz bulardıń qádirine jetiwimiz hám Watanımızdı kóz qarashıǵınday qorǵawımız kerekligin atap ótti.

Institut rektorı Quvondiq Qodirov Qádirbay ataǵa búgingi áwladlar atınan sheksiz minnetdarshılıq bildirip, bayram sawǵaların tapsırdı.

NMPI baspasóz xızmeti.