Búgin, 12-may kúni Ájiniyaz atındaǵı Nókis mámleketlik pedagogikalıq institutında jaslar tálim-tárbiyası, jınayatshılıq hám huqıqbuzarlıqlardıń aldın alıw máselelerine arnalǵan gezektegi jıynalıs bolıp ótti.

Institut rektorı Quvondiq Qodirov basqarıp barǵan jıynalısqa jaslar tárbiyası boyınsha juwapkerler – rektor másláhátshisi, jaslar jetekshisi, tiyisli bólimlerdiń baslıqları, fakultet dekanlarınıń jaslar menen islesiw boyınsha orınbasarları, hayal-qızlar máseleleri boyınsha másláhátshileri, tyutorlar, psixologlar qatnastı.

Ilajda institut rektorı jaslar arasında ruwxıy-aǵartıwshılıq baǵdarındaǵı jumıslardıń áhmiyeti hám huqıqbuzarlıqlardıń aldın alıw máselelerine toqtalıp, ámelge asırılıp atırǵan jumıslarǵa sın kózqarastan analiz jasadı jáne orın alıp atırǵan kemshiliklerdi atap ótti.

Jıynalısta studentler arasında bilim alıwǵa bolǵan qızıǵıwshılıqtı arttırıw, sabaqtan bos waqıtların mazmunlı shólkemlestiriw hám olardı hár qıylı paydalı joybarlarǵa qamtıp alıw, jaslar arasında jınayatshılıq hám huqıqbuzarlıqlardı kemeytiw maqsetinde alıp barılıp atırǵan profilaktikalıq ilajlardıń nátiyjeliligin arttırıw jolları dodalandı.

Studentler arasında dúnyaǵa salamat kózqarastı qáliplestiriw, olardı jat ideyalardan qorǵaw hám milliy qádiriyatlarımızdı úgit-násiyatlaw baǵdarında ámelge asırılıp atırǵan jumıslar kórip shıǵılıp, bular boyınsha aldaǵı maqset jáne wazıypalar belgilep alındı.

Jıynalıs sońında studentler arasında huqıqbuzarlıqlardıń aldın alıwǵa baǵdarlanǵan úgit-násiyat jumısların turaqlı túrde alıp barıw, institutta ruwxıy-aǵartıwshılıq ilajlarınıń nátiyjeliligin arttırıw, studentler menen islesiwde pedagogikalıq qatnastı jetilistiriw hám olardıń mashqalaların óz waqtında sheshiwge baǵdarlanǵan mexanizmlerdi engiziw boyınsha barlıq juwapkerlerge tiyisli tapsırmalar berildi.

NMPI baspasóz xızmeti.