Búgin, 12-may kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidentiniń «Joqarı bilimlendiriw shólkemleri pitkeriwshileriniń jumısqa ornalasıwına kómeklesiw boyınsha qosımsha ilajlar haqqında»ǵı qararı tiykarında ámelge asırılıp atırǵan «Keleshekke qádem» baǵdarlaması sheńberinde ushırasıw bolıp ótti.

Ushırasıwǵa Joqarı bilimlendiriw, ilim hám innovaciyalar ministrliginiń Bilimlendiriw shólkemleriniń jumısların monitoring etiw bóliminiń baslıǵı, yuridika ilimleri boyınsha filosofiya doktorı Begali Xolmirov, Ózbekstan Respublikası Oraylıq banki bólim baslıǵı Elyor Ikramov, «ÓzMilliybank» akcionerlik jámiyeti jáne akcionerlik-kommerciyalıq «Aloqabank»tiń tiyisli juwapkerleri, joqarı oqıw orınlarınıń isbilermenlik penen shuǵıllanıwdı qáleytuǵın pitkeriwshi student-jasları qatnastı.

Ilajda qánigeler «Keleshekke qádem» baǵdarlamasınıń mazmunı hám áhmiyeti jóninde qatnasıwshılarǵa tolıq maǵlıwmatlar berdi.

Óz biznes ideyaların ámelge asırıw niyeti bolǵan pitkeriwshi kurs studentleri biznes ideyanı tayar joybarǵa shekem jetkeriw procesinde tolıq birge islesiw hám qolaylı shártlerde qarjılandırıw, tarawlar boyınsha ashıq tańlawlar ótkeriw hám jeńimpazlardı jumıs penen támiyinlewge kómeklesiw sıyaqlı máseleler boyınsha ózlerin qızıqtırǵan sorawlarǵa juwaplar aldı.

Ushırasıwda Ózbekstan mámleketlik kórkem óner hám mádeniyat institutı Nókis filialınıń studenti Yorqin Boyxorozovtıń 70 million sumlıq kredit máselesi usı jerdiń ózinde sheshimin taptı.

NMPI baspasóz xızmeti.