Ájiniyaz atındaǵı Nókis mámleketlik pedagogikalıq institutında jaslar arasında jınayatshılıq hám huqıqbuzarlıqlardıń aldın alıw, korrupciyalıq jaǵdaylarǵa qarsı gúresiw, studentler arasında sociallıq salamat ortalıqtı qáliplestiriw máselelerine arnalǵan «Sergeklik – dáwir talabı» atamasındaǵı ushırasıw bolıp ótti.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov kiris sózi menen ashıp berdi hám búgingi ushırasıw jaslar tálim-tárbiyasındaǵı áhmiyetli úgit-násiyat ilajlarınıń biri ekenligin atap ótti.

Ushırasıwda Qaraqalpaqstan Respublikası Ádillik ministrligi huqıqıy málimleme sektorınıń bas másláhátshisi Baxıtgúl Matjanova, instituttıń úlken yuristkonsultı Baxıtgúl Arzieva, fizikalıq hám yuridikalıq shaxslardıń múrájatları menen islesiw hám qadaǵalaw-monitoring bóliminiń baslıǵı Tursımurat Esemuratov, korrupciyaǵa qarsı gúresiw «Komplaens-qadaǵalaw» sistemasın basqarıw bóliminiń bas qánigesi Gúlistan Dálibaevalar sózge shıǵıp, «Korrupciyaǵa qarsı gúresiw haqqında», «Mápler soqlıǵısıwı haqqında»ǵı Ózbekstan Respublikasınıń Nızamları, student-jaslar arasında jınayatshılıq hám huqıqbuzarlıqlardıń aldın alıw boyınsha ámelge asırılıp atırǵan jumıslar, olardıń mazmunı hám áhmiyeti haqqında tolıq maǵlıwmatlar berdi.

Seminar dawamında sózge shıqqanlar elimizde jámiyetlik-siyasiy, social-ekonomikalıq tarawlardıń rawajlanıwına keri tásir etip atırǵan korrupciyalıq háreketlerdiń aldın alıw maqsetinde 2017-jıl 3-yanvarda qabıl etilgen «Korrupciyaǵa qarsı gúresiw haqqında»ǵı, sonday-aq, Prezidentimiz tárepinen 2024-jıldıń 5-iyun kúni tastıyıqlanǵan «Mápler soqlıǵısıwı haqqında»ǵı Ózbekstan Respublikasınıń nızamları, olardan kelip shıǵıp tarawlarda, ásirese, bilimlendiriw tarawındaǵı usınday háreketlerdiń aldın alıw boyınsha ámelge asırılıp atırǵan jumıslar, aldaǵı wazıypalarǵa toqtalıp ótti.

NMPI baspasóz xızmeti.