Ájiniyaz atındaǵı Nókis mámleketlik pedagogikalıq institutında «Ózbekstan – ulıwma úyimiz!» súreni tiykarında «Biz – bir shańaraq perzentlerimiz» atamasındaǵı milletler aralıq tatıwlıq hám doslıq festivalı bolıp ótti.

Ilajǵa Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov, Qaraqalpaqstan Respublikası «Nuranıy» qorınıń baslıǵı Tursınbay Abdijabbarov, Ózbekstan Respublikasına miyneti sińgen jaslar ustazı Begdulla Sultanov, Qaraqalpaqstan Respublikasına miyneti sińgen mádeniyat xızmetkeri Maqset Matekov qatnasıp, búgingi globallasıw dáwirinde milletler aralıq tatıwlıq, óz ara awızbirshilik, doslıq qatnasıqları jámiyetimiz hám mámleketimizdiń hár tárepleme rawajlanıwında úlken áhmiyetke iye baǵdarlardıń biri ekenligin atap ótti.

Festivalda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov sózge shıǵıp, bunday bayramlar jaslarımız arasında doslıq, húrmet hám mádeniy kóp túrlilikti ele de bekkemlew, studentler arasında awızbirshilik hám keńpeyillikti úgit-násiyatlaw jáne hár bir millet wákiline húrmet penen qatnasta bolıw mádeniyatın qáliplestiriwge xızmet etetuǵınlıǵın bildirip ótti.

Festival instituttıń sheber qollı, ónerment hám sportshı jaslarınıń kórgizbesi menen baslanǵan bolsa, «Tumaris» xalıq ansambli hám talantlı student-jaslar atqarıwındaǵı koncert baǵdarlaması bayram qatnasıwshılarına kóterińki keypiyat inám etti.

Bayram qatnasıwshıları hám jaslar túrli millet wákilleriniń yoshlı qosıqları, ayaq-oyınların birgelikte atqarıp, festivaldıń joqarı dárejede ótiwine úleslerin qostı.

Maǵlıwmat ornında atap ótiw kerek, házirgi waqıtta Ájiniyaz atındaǵı Nókis mámleketlik pedagogikalıq institutında 17 mıńǵa shamalas student-jaslar bilim alıp atırǵan bolıp, oqıw dárgayında qaraqalpaq, ózbek, qazaq, túrkmen, rus, ukrain, koreys, qırǵız, tájik, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler bir shańaraqtıń perzentlerindey, awızbirshilikte oqıp atır.

NMPI baspasóz xızmeti.