Qazaqstan Respublikasınıń eń abıroylı joqarı oqıw orınlarınıń biri Ál-Farabiy atındaǵı Qazaq milliy universiteti Basqarma Baslıǵı – Rektor Janseyit Túymebaev 18-may kúni xızmet saparı sheńberinde Ájiniyaz atındaǵı Nókis mámleketlik pedagogikalıq institutına keldi.

Miymanlardı institut rektorı Quvondiq Qodirov basshılıǵındaǵı tiyisli juwapkerler saltanatlı túrde kútip aldı.

Instituttıń talantlı student-jaslarınan dúzilgen «Sıy perde» hám «Baldáwren» ansamblleri aǵzaları atqarıwındaǵı milliy qosıqlar, kóp milletli tatıw jámáátimiz belgisi bolǵan milliyligimiz kórgizbesi qazaqstanlı miymanlarda ayrıqsha tásir qaldırdı.

– Bul meniń Qaraqalpaqstan Respublikasına birinshi márte keliwim. Nókis qalası mende ayrıqsha tásirler qaldırdı, institutıńızdıń jańa imaratı da oǵada sulıw hám zamanagóy eken. Ásirese, men bul jerde birneshe millet wákilleriniń awızbirshilikte, óz ara doslıq qatnasıqlarda jasap atırǵanın kórip háwes ettim. Biziń universitetimiz de Oraylıq Aziyada zamanagóy bilim hám tájiriybege iye bolǵan kadrlardı tayarlawda aldınǵı joqarı oqıw orınlarınıń biri bolıp esaplanadı. Búgingi saparımız usı baǵdardaǵı birge islesiwimizde ámeliy áhmiyetke iye boladı dep oylayman, – dedi Qazaq milliy universiteti rektorı Janseyit Túymebaev.

Bunnan soń miymanlar institutta Ózbekstan Respublikası Prezidentiniń «Belgili qaraqalpaq shayırı hám oyshılı Ájiniyaz Qosıbay ulınıń tuwılǵanınıń 200 jıllıǵın keń túrde belgilew haqqında»ǵı qararı tiykarında shólkemlestirilgen Ájiniyaz muzeyinde boldı.

Rektor Quvondiq Qodirov institut professor-oqıtıwshıları tárepinen alıp barılǵan izertlewler nátiyjesinde islengen Ájiniyaz Qosıbay ulınıń áwladlar shejiresi, sonday-aq, shayır jasaǵan dáwirge tiyisli kitaplar, qunlı qoljazbalar, tariyxıy buyımlar hám kiyim-kensheklerdiń kórgizbeleri menen tanıstırdı.

Ál-Farabiy universiteti rektorı muzeydiń estelikler kitabına óziniń eń jaqsı tileklerin jazıp qaldırdı.

Sońınan miymanlar instituttıń oqıw laboratoriyaların barıp kórip, professor-oqıtıwshılar menen sáwbetlesti.

Janseyit Túymebaev institutta student-jaslardıń teoriyalıq bilimlerin bekkemlew maqsetinde jaratılǵan sharayatlarǵa joqarı baha berip, aldaǵı birge islesiwlerde oqıw hám ilimiy laboratoriyalardı birgelikte shólkemlestiriw, ilimiy-izertlewlerdi birge alıp barıw boyınsha usınısların bildirdi.

Bunnan soń rektorlar hám instituttıń tiyisli juwapkerleri rásmiy ushırasıw ótkerdi.

Ushırasıwda joqarı oqıw orınları basshıları Ózbekstan hám Qazaqstan arasında hár tárepleme birge islesiw rawajlanıp, strategiyalıq awqamlaslıq hám doslıq qatnasıqları ele de bekkemlenip atırǵanına ayrıqsha toqtalıp ótti.

Atap ótilgenindey, usınday birge islesiw sheńberinde joqarı bilimlendiriw tarawında da jańa baǵdarlardı ashıw házirgi dáwirdiń baslı talabı esaplanadı.

Dúnyanıń abıroylı reyting shólkemleri tárepinen «TOP-163»lik dizimge kirgizilgen Ál-Farabiy atındaǵı Qazaq milliy universiteti hám Ájiniyaz atındaǵı Nókis mámleketlik pedagogikalıq institutı birneshe jıllardan berli nátiyjeli birge islesiwdi jolǵa qoyǵan bolıp, usı jıldıń fevral ayında eki tárepleme birge islesiwdi bunnan bılay da rawajlandırıw boyınsha memorandumǵa qol qoyılǵan edi.

Ushırasıwda memorandum sheńberinde akademiyalıq mobillik, eki diplomlı qospa bilimlendiriw baǵdarlamaların jolǵa qoyıw, professor-oqıtıwshılardıń qánigeligin jetilistiriw, institutta Ál-Farabiy universitetiniń orayın ashıw, xalıqaralıq hám jergilikli grant joybarlarına qatnasıwda professor-oqıtıwshılardıń birgelikte jumıs alıp barıwı sıyaqlı máseleler boyınsha aldaǵı ámelge asırılatuǵın jumıslar belgilep alındı.

Ushırasıw juwmaǵında institut rektorı Quvondiq Qodirov Janseyit Túymebaevqa estelik sawǵaları, sonıń ishinde, Ál-Farabiy atındaǵı Qazaq milliy universitetiniń 90 jıllıǵı múnásibeti menen tayarlanǵan «Jetekshi universitet jılnaması» atamasındaǵı kitaptıń qaraqalpaq tiline awdarmasın tapsırdı.

Ál-Farabiy universiteti rektorı joqarı dárejede kútip alǵanı ushın institut rektorı hám jámáátine minnetdarshılıq bildirip, búgingi ushırasıw aldaǵı birge islesiwdi ele de bekkemlewge xızmet etetuǵınlıǵın atap ótti.

NMPI baspasóz xızmeti.