Ájiniyaz atındaǵı Nókis mámleketlik pedagogikalıq institutı Tariyx fakultetinde Qazaqstan Respublikası Xoja Axmed Yassawiy atındaǵı Xalıqaralıq qazaq-túrk universiteti professorı Salıy Sadıqov penen ushırasıw bolıp ótti.

Belgili pedagog, filosof ilimpaz, sheber dóretiwshi Salıy Sadıqov Qaraqalpaqstan Respublikasınıń Qaraózek rayonında tuwılǵan bolıp, Tashkent mámleketlik universitetiniń Jurnalistika fakultetinde oqıdı. Ol universitetti pitkergennen soń respublikamızdıń baspasóz tarawında jemisli miynet etti. 1965-1978-jılları Ózbekstan Ilimler Akademiyası Qaraqalpaqstan bóliminiń Nájim Dáwqaraev atındaǵı Tariyx, til hám ádebiyat institutında aǵa ilimiy xızmetker bolıp isledi hám filosof ilimpaz Jumanazar Bazarbaevtıń basshılıǵında ilimiy-izertlew jumısların alıp bardı. 1974-jılı kandidatlıq dissertaciyasın tabıslı qorǵadı.

Ol 1990-jılı Nókis mámleketlik pedagogikalıq institutı qayta ashılǵannan keyin kafedra baslıǵı, prorektor sıyaqlı juwapkerli wazıypalardı atqardı.

Tariyx fakultetindegi akademik Jumanazar Bazarbaevtıń muzeyinde shólkemlestirilgen ushırasıwda fakultet jámááti professor Salıy Sadıqov penen birge islesken dáwirdegi tariyxıy waqıyalardı eske aldı, házirgi bilimlendiriwdiń áhmiyetli baǵdarları boyınsha óz ara pikir almastı.

Ushırasıw sońında professorǵa húrmet kórsetilip, sawǵalar tapsırıldı.

NMPI baspasóz xızmeti.