Ájiniyaz atındaǵı Nókis mámleketlik pedagogikalıq institutında joqarı bilimlendiriw tarawında korrupciyalıq jaǵdaylarǵa qarsı gúresiw hám olardıń aldın alıwǵa máselelerine arnalǵan «Korrupciya – jámiyet rawajlanıwınıń tosıǵı» atamasındaǵı ushırasıw bolıp ótti.

Ushırasıwǵa Qaraqalpaqstan Respublikası Ministrler Keńesiniń Korrupciyaǵa qarsı ishki qadaǵalaw bóliminiń baslıǵı Batır Matmuratov, Ózbekstan Respublikası Bas prokuraturası janındaǵı Ekonomikalıq jınayatlarǵa qarsı gúresiw departamenti Qaraqalpaqstan Respublikası basqarmasınıń bólim baslıǵı Rashid Sadıkov, Qaraqalpaqstan Respublikası Ishki isler ministrliginiń qánigesi Habibulla Ruzimbetov, institut fakultetleriniń dekanları hám olardıń orınbasarları, kafedra baslıqları, professor-oqıtıwshılar, tyutorlar jáne pedagog xızmetkerler qatnastı.

Ilajdı institut rektorı Quvondiq Qodirov basqarıp bardı.

Ushırasıwda sózge shıqqanlar tárepinen atap ótilgenindey, hár qanday rawajlanıwdıń tamırına balta uratuǵın illetlerdiń biri korrupciya bolıp esaplanadı. Elimizde usınday illetlerge qarsı gúresiw, olardıń aldın alıw máselesine ayrıqsha itibar qaratılıp, bul baǵdardaǵı nızamshılıq bazası da jetilistirilmekte. Usı tiykarda puqaralardıń juwapkershiligi de arttırılmaqta.

Usı jıldıń 5-mart kúni mámleketimiz basshısı Korrupciyaǵa qarsı gúresiw milliy keńesiniń májilisinde qatnasıp, «Korrupciya – reformalar jolındaǵı eń úlken tosıq» ekenligin atap ótken edi.

Ilajda taraw qánigeleri mámleketimizde barlıq tarawlardıń rawajlanıwına keri tásir etip atırǵan korrupciyalıq háreketlerdiń aldın alıw maqsetinde 2017-jıl 3-yanvarda qabıl etilgen «Korrupciyaǵa qarsı gúresiw haqqında»ǵı, sonday-aq, Prezidentimiz tárepinen 2024-jıldıń 5-iyun kúni tastıyıqlanǵan «Mápler soqlıǵısıwı haqqında»ǵı Ózbekstan Respublikasınıń nızamları, olardan kelip shıǵıp tarawlarda, ásirese, bilimlendiriw tarawındaǵı usınday háreketlerdiń aldın alıw boyınsha ámelge asırılıp atırǵan jumıslar, aldaǵı wazıypalarǵa toqtalıp ótti.

Korrupciyaǵa qarsı gúresiw elimizde Prezidentimiz Sh.Mirziyoyevtiń basshılıǵında mámleketlik siyasattıń tiykarǵı baǵdarlarınıń biri sıpatında belgilep berilgen bolıp, bunda eń áhmiyetli ilajlardıń biri – xalıqtıń huqıqıy sawatlılıǵı hám bilimlerin arttırıw ekenligi atap ótilgen edi.

Ámelge asırılıp atırǵan usınday jumıslarǵa qaramastan, tarawlarda korrupciyalıq háreketler anıqlanıp, olarǵa nızamlı sharalar kórilmekte.

Joqarı bilimlendiriwde korrupciyalıq háreketlerdiń aldın alıw ushın maǵlıwmatlardı alıw elektron, hújjet tapsırıw onlayn formatlarǵa ótkerilip, házirgi waqıtta imtixanlardı onlayn tárizde Internet tarmaqları arqalı ashıq-aydın ótkeriw jolǵa qoyılǵanlıǵı, sonday-aq, eń áhmiyetlisi, hár bir joqarı oqıw orınlarında korrupciyaǵa qarsı gúresiw maqsetinde komplaens-qadaǵalaw bólimi shólkemlestirilip, bul baǵdardaǵı anıq jumıslar belgilengenligi sóz etildi.

Ilajda dámegóylik, para alıw hám beriw, belgili bir sawǵa esesine adamlardıń huqıq hám máplerine qarsı háreket etiw ámeldegi nızamshılıq tiykarında qadaǵan etiletuǵınlıǵı, eger usınday jaǵdaylar anıqlanatuǵın bolsa, jınayıy juwapkershilikke tiykar bolatuǵınlıǵı anıq mısallar menen atap ótildi.

Tarawlarda korrupciyalıq jaǵdaylarǵa qarsı gúresiw baǵdarında ámelge asırılıp atırǵan huqıqıy-operativ ilajlardan tayarlanǵan videorolik qatnasıwshılar názerine usınıldı.

NMPI baspasóz xızmeti.