Ájiniyaz atındaǵı Nókis mámleketlik pedagogikalıq institutı Tábiyiy pánler fakulteti tárepinen «Tábiyiy pánlerdiń aktual máseleleri» atamasındaǵı VI xalıqaralıq ilimiy-teoriyalıq konferenciyası shólkemlestirildi.

Konferenciyanıń ashılıw plenar májilisinde Rossiya, Belarus, Qıtay, Malayziya sıyaqlı mámleketlerden, sonday-aq, respublikamızdaǵı jetekshi joqarı oqıw orınları, ilimiy-izertlew oraylarınıń alımları, fakultettiń professor-oqıtıwshıları, doktorantlar, magistrantlar hám studentler qatnastı.

Ilajdı instituttıń ilimiy isler hám innovaciyalar boyınsha prorektorı wazıypasın waqıtsha atqarıwshısı Polatbek Kalxanov kiris sózi menen ashıp berip, ótkerilip atırǵan ilimiy konferenciyaǵa 200 ge shamalas maqala jáne tezisler kelip túskenin atap ótti.

Plenar májiliste Ózbekstan Ilimler Akademiyası Qaraqalpaqstan bólimi Qaraqalpaq tábiyat ilimleri ilimiy-izertlew institutı direktorınıń orınbasarı, fizika-matematika ilimleriniń kandidatı Hákimbay Atajanovtıń «Kemiriwshiler populyaciyası sanın prognozlaw ushın matematikalıq hám kompyuter modelleri», Qaraqalpaq mámleketlik universiteti professorı Mapruza Allaniyazovanıń «Ámiwdárya jer ústi ishimlik suw dáreginiń ximiyalıq quramın úyreniw», instituttıń botanika, ekologiya hám onı oqıtıw metodikası kafedrasınıń docenti Inamjan Saparniyazovtıń «Qaraqalpaqstan sharayatında gidrogelden paydalanıp mazalı mákke jetistiriw», institut tayanısh doktorantı Miyassar Qarlıbaevanıń «Aralboyı sharayatında XYLOSALSOLA RICHTERI (MOQ.) AKHANI&ROALSON cenopopulyaciyalarınıń ekologiyalıq-fitocenotikalıq túsindirmesi» atamasındaǵı bayanatları tıńlandı.

Konferenciya tábiyiy pánler tarawı, tábiyiy resurslardan racional paydalanıw, shıǵındısız texnologiyalardı engiziw hám tábiyiy pánlerdi oqıtıw metodikası boyınsha áhmiyetli mashqalalarǵa keń jámiyetshiliktiń dıqqatın qaratıw, sırt el ilimiy izleniwshileri menen birge islesiw, tájiriybe almasıw maqsetinde shólkemlestirilgen bolıp, ilaj «Tábiyiy pánler tarawında ilimiy jetiskenlikler, mashqalalar hám perspektivalar», «Ximiya hám ximiyalıq texnologiya», «Tábiyiy pánlerdi oqıtıwdıń metodikası hám texnologiyası» sıyaqlı sekciyalarda óz jumısın dawam ettirdi.

Konferenciyada sońǵı jılları Aralboyı regionında ekologiyalıq jaǵdaydı túp-tiykarınan jaqsılaw, aymaqtı sociallıq-ekonomikalıq jaqtan rawajlandırıwdı jedellestiriw hám xalıqtıń turmıs tárizin arttırıwǵa baǵdarlanǵan keń kólemli reformalardıń ámeliy nátiyjeleri de keń túrde dodalandı.

Konferenciyada bayanatshılar tárepinen tábiyiy pánlerdi oqıtıwdıń basqa da áhmiyetli máseleleri dógereginde ilimiy pikirler, juwmaqlar bildirildi.

NMPI baspasóz xızmeti.