Ájiniyaz atındaǵı Nókis mámleketlik pedagogikalıq institutı Tariyx fakulteti tariyx tálim baǵdarınıń 2-kurs studentleri qánigelik ámeliyatı kúnleri sheńberinde institutta shólkemlestirilgen Ájiniyaz muzeyinde bolıp, bul jerdegi eksponatlar menen tanıstı.

Tariyxtı oqıtıw metodikası kafedrasınıń aǵa oqıtıwshısı Sarıbay Dosmaganbetov studentlerge muzeydi shólkemlestiriw menen baylanıslı ámelge asırılǵan jumıslar haqqında tolıq maǵlıwmat berdi.

Bul muzey 2024-jılı 16-iyul kúni qabıl etilgen «Belgili qaraqalpaq shayırı hám oyshılı Ájiniyaz Qosıbay ulı tuwılǵan kúniniń 200 jıllıǵın keńnen belgilew haqqında»ǵı Prezident qararı tiykarında shólkemlestirilgen bolıp, muzeyge kelgen hár qanday adam Ájiniyaz Qosıbay ulınıń ómiri hám dóretiwshiligi, sonıń menen birge, institut tariyxı haqqında maǵlıwmatlarǵa iye boladı.

Ilaj dawamında Sarıbay Dosmaganbetov muzeyge «Ámiwdárya» jurnalınıń Ájiniyaz babamızdıń yubileyine arnalǵan sanı, sonday-aq, ata-babalarımız tárepinen paydalanılǵan turmıslıq buyımlardı tapsırdı.

Qánigelik ámeliyatı dawamında studentler muzey hám Ájiniyaz shayır haqqında tolıq maǵlıwmatlarǵa iye boldı.

NMPI baspasóz xızmeti.