Búgin, 3-iyun kúni Qazaqstan Respublikası Shaxmardan Esenov atındaǵı Kaspiy texnologiyalar hám injiniring universiteti prezidenti Berik Axmetov basshılıǵındaǵı delegaciya Ájiniyaz atındaǵı Nókis mámleketlik pedagogikalıq institutına keldi.

Miymanlar dástúrge say tárizde nan-duz benen kútip alındı. Instituttıń talantlı studentlerinen dúzilgen «Sıy perde» hám «Baldáwren» ansamblleri aǵzaları atqarıwındaǵı milliy qosıqlar qazaqstanlı miymanlarda ayrıqsha tásir qaldırdı.

Institut rektorı Quvondiq Qodirov delegaciya aǵzalarına Ájiniyaz muzeyin tanıstırıp, bul jerdegi eksponatlar haqqında maǵlıwmat berdi.

Bunnan soń eki joqarı oqıw ornı basshılarınıń rásmiy ushırasıwı ótkerildi.

Ushırasıwda bilimlendiriw, ilimiy-izertlew hám innovaciyalar baǵdarlarında birge islesiwdi jańa basqıshqa kóteriwdiń áhmiyeti atap ótildi. Joqarı oqıw orınları arasında qospa bilimlendiriw baǵdarlamasın jolǵa qoyıw, professor-oqıtıwshılardıń qánigeligin arttırıw, studentlerdi almasıw, oqıw-metodikalıq resurslar hám laboratoriyalardan birgelikte paydalanıw, xalıqaralıq ilimiy bazalar, ilimiy jurnallarda maqalalar járiyalaw, ilimiy konferenciyalar shólkemlestiriw boyınsha ámelge asırılatuǵın jumıslar belgilep alındı.

Ushırasıwda atap ótilgen máseleler boyınsha birge islesiwdi bunnan bılay da jetilistiriw maqsetinde eki joqarı oqıw ornı arasında shártnamaǵa qol qoyıldı.

Kaspiy texnologiyalar hám injiniring universiteti prezidenti Berik Axmetov joqarı dárejedegi ushırasıw ushın institut rektorı Quvondiq Qodirov hám institut jámáátine minnetdarshılıq bildirdi.

NMPI baspasóz xızmeti.