Berdaq atındaǵı Qaraqalpaq mámleketlik universitetinde Ózbekstan Respublikası Joqarı bilimlendiriw, ilim hám innovaciyalar ministrligi, Jaslar isleri agentligi hám Ózbekstan jaslar awqamı Oraylıq Keńesi tárepinen shólkemlestirilgen «Debat» intellektual turniriniń aymaqlıq basqıshı bolıp ótti.

Intellektual turnirge Qaraqalpaqstan Respublikasındaǵı barlıq joqarı oqıw orınlarınıń qábiletli studentlerinen dúzilgen komandalar qatnastı.

Turnir dawamında qatnasıwshılar ulıwma 8 tema boyınsha «Tastıyıqlawshı» hám «Biykarlawshı» poziciyalarda ózleriniń debat alıp barıw sheberligi, bilim hám kónlikpelerin kórsetiwge háreket etti.

Quwanıshlı tárepi, intellektual turnirde Ájiniyaz atındaǵı Nókis mámleketlik pedagogikalıq institutı komandası jeńimpaz bolıp, turnirdiń respublikalıq final basqıshına jollamanı qolǵa kirgizdi.

Turnirdiń aymaqlıq basqıshında Qaraqalpaq mámleketlik universiteti komandası 2-orındı, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı, sonday-aq, Ózbekstan mámleketlik kórkem óner hám mádeniyat institutı Nókis filialı komandaları sıylı 3-orındı iyeledi.

Institutımız jaslarına turnirdiń respublikalıq basqıshında áwmet tileymiz!

NMPI baspasóz xızmeti.