Búgin, 14-iyun kúni Ájiniyaz atındaǵı Nókis mámleketlik pedagogikalıq institutı akademiyalıq liceyinde 2024-2025-oqıw jılı pitkeriwshi basqısh oqıwshıların joqarı oqıw orınlarına maqsetli baǵdarlaw hám saltanatlı diplom tapsırıwǵa arnalǵan bayram keshesi bolıp ótti.

Kesheni akademiyalıq licey direktorı Q.Qalxorazov ashıp berdi hám Prezidentimizdiń elimizdiń bilimlendiriw mákemelerin pitkeriwshi jaslarǵa jollaǵan qutlıqlawın jetkerdi.

Ilajda instituttıń oqıw isleri boyınsha prorektorı M.Ibragimov hám tiyisli bólimlerdiń juwapkerleri, professor-oqıtıwshılar qatnasıp, akademiyalıq liceydi joqarı nátiyjeler menen pitkerip atırǵan oqıwshılarǵa diplomlardı saltanatlı túrde tapsırdı.

Maǵlıwmat ornında atap ótiw kerek, bıyılǵı oqıw jılında akademiyalıq liceydi ulıwma 279 oqıwshı pitkerip atırǵan bolsa, sonnan bir oqıwshı altın, úsh oqıwshı gúmis medal, al 18 oqıwshı ayrıqsha diplom menen pitkermekte. Olardan ulıwma 306 oqıwshı milliy hám xalıqaralıq sertifikatlarǵa iye. Oqıwshılar arasında múddetinen aldın dúnyanıń hám respublikamızdıń abıroylı joqarı oqıw orınlarına qabıllanǵan, sonıń menen birge, respublikalıq hám xalıqaralıq pán olimpiadaları, sport hám intellektual jarıslar, stipendiyalar tańlawlarınıń jeńimpazları, oqıwda hám jámiyetlik jumıslarda ayrıqsha belsendilik kórsetip atırǵan jaslar kópshilikti quraydı.

Bayram keshesinde sózge shıqqanlar usınday jaslarımız mámleketimizdiń jarqın keleshegi ushın xızmet etetuǵın qánigeler bolıp jetisiwine isenim bildirip, olardıń aldaǵı úlken maqsetlerine erisiwinde tabıslar tiledi.

Ilaj akademiyalıq licey oqıwshılarınıń atqarıwındaǵı koncert baǵdarlaması menen dawam etti.

NMPI baspasóz xızmeti.