Ájiniyaz atındaǵı Nókis mámleketlik pedagogikalıq institutında pitkeriwshi kurs studentleriniń bántligin támiyinlew hám isbilermenlik baslamaların qollap¬-quwatlaw máselelerine arnalǵan ushırasıw bolıp ótti.

Ushırasıwda institut rektorı Quvondiq Qodirov sózge shıǵıp, jaslardıń biznes ideya hám baslamaların qollap-quwatlaw, isbilermenlik kónlikpelerin rawajlandırıw, jas isbilermenlik subyektleriniń ekonomikalıq tarawlardaǵı, sonıń ishinde, startap hám innovaciyalıq joybarların júzege shıǵarıwǵa kómeklesiw, kásip-óner, sanlı texnologiyalar hám shet tillerin puqta iyelewi ushın qosımsha sharayatlar jaratıw, sonday-aq, jaslar bántligin támiyinlew maqsetinde 2025-jıl 14-fevralda qabıl etilgen Ózbekstan Respublikası Prezidentiniń PQ-61 hám PQ-62-sanlı qararları haqqında toqtalıp ótti.

Ilajda «Milliybank»tiń Qaraqalpaqstan bólimi basqarıwshısınıń orınbasarı Sherazatdin Shınıbaev, «Aloqabank»tiń Qaraqalpaqstan filialı jetekshi qánigesi Ájiniyaz Qurbaniyazov, «Milliybank»tiń «Keleshekke qádem» orayınan institutqa juwapker qánigesi Klara Sharipovalar pitkeriwshi student-jaslardıń sorawlarına juwap berdi.

Ushırasıwda qánigeler jaslarǵa Prezidentimizdiń arnawlı qararları tiykarında pitkeriwshi kurs studentleri ushın «Milliybank» tárepinen «Keleshekke qádem», «Keleshek ushın start», «Jarqın keleshekke qaray» joybarları sheńberinde 10 million sumnan 1 milliard sumǵa shekem, elimiz jasları ushın «Aloqabank» tárepinen «Bizneske birinshi qádem» hám «Jaslar ushın jumıs orınları» joybarları tiykarında 100 million sumnan 5 milliard sumǵa shekem jeńillikli kreditler ajıratılatuǵınlıǵın túsindirip ótti.

Jaslar óz biznes hám startap joybarların jolǵa qoyıw, isbilermenlik penen shuǵıllanıw arqalı bántligin támiyinlew boyınsha sorawlarına tolıq juwaplar aldı.

NMPI baspasóz xızmeti.