Prezidenttiń PF-81-sanlı Pármanına muwapıq, joqarı oqıw orınlarınıń bakalavriatına qabıllaw procesi eki basqıshta – «aldın test, sońınan tańlaw» principi tiykarında ámelge asırıladı.

1-basqıshta abiturientler hár jılı 5-iyunnan 25-iyunǵa shekem (sol kúni de) test sınaǵın tapsırıw ushın my.uzbmb.uz saytınan onlayn dizimnen ótedi hám tómendegilerdi saylaydı:

Tek ǵana test sınaǵında qatnasatuǵın bolsa:

– pánler kompleksi;
– oqıtıw tili;
– test tapsırıw aymaǵı.

Ayrıqsha qábilet talap etiletuǵın tálim baǵdarları boyınsha kásiplik (dóretiwshilik) imtixanlarda qatnasatuǵın bolsa:

– oqıtıw tili;
– test tapsırıw aymaǵı;
– ayrıqsha qábilet talap etiletuǵın tálim baǵdarı;
– kásiplik (dóretiwshilik) imtixan tapsırılatuǵın joqarı oqıw ornı.

Joqarı oqıw orınlarına kiriw imtixanları iyul-avgust aylarında ótkeriledi.

2-basqıshta abiturientler kiriw imtixanları tolıq juwmaqlanǵannan soń 15 kún dawamında my.uzbmb.uz saytı arqalı tómendegilerdi saylaydı:

– joqarı oqıw ornı;
– bakalavriat tálim baǵdarı;
– oqıtıw forması;
– tańlaw ústemligi.

Abiturient test sınaǵında toplaǵan balların imtixan ótkerilgen kúnniń erteńine biliwi múmkin. Onıń studentlikke usınıs etilgen yamasa etilmegeni qabıllaw procesiniń 2-basqıshı tolıq juwmaqlanǵannan keyin bir hápte múddette Bilimdi bahalaw agentliginiń rásmiy veb-saytında járiyalanadı.

Texnikumlarda oqıw niyetin bildirgen abiturientler joqarı oqıw orınlarına qabıllaw nátiyjesi járiyalanǵannan soń 10 kún múddette tómendegilerdi saylaydı:

– texnikum;
– kásip hám qánigelik;
– oqıtıw forması.

Nátiyje bir hápte múddette Bilimdi bahalaw agentliginiń rásmiy veb-saytında járiyalanadı.

Abiturientler hám olardıń ata-analarına qolaylıqlar jaratıw maqsetinde Ájiniyaz atındaǵı Nókis mámleketlik pedagogikalıq institutında qabıllaw komissiyasınıń jumısları jolǵa qoyıldı.

Puqaralar institut qabıllaw komissiyası Call-orayınıń +998612294095, +998612294101 telefon nomerleri, sonday-aq, ministrliktiń 1006, agentliktiń 1195 isenim telefonı yamasa @EduuzUniversalBot’qa múrájat etken halda ózlerin qızıqtırǵan sorawlarına juwap alıwı múmkin.

NMPI baspasóz xızmeti.