Búgin, 24-iyun kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Joqarı bilimlendiriw, ilim hám innovaciyalar ministrligi tárepinen kásiplik bilimlendiriw mákemeleri oqıwshı-jasları arasında matematika, ximiya, fizika, informatika hám biologiya pánleri boyınsha «Ministr kubogi» olimpiadası ótkerildi.

Kásiplik bilimlendiriw mákemeleri oqıwshıları arasında birinshi márte ótkerilip atırǵan pánler olimpiadasınıń dáslepki basqıshı Qaraqalpaqstan Respublikasındaǵı ulıwma 43 texnikumda joqarı dárejede shólkemlestirilip, jeńimpaz bolǵan oqıwshılar respublikalıq basqıshqa jollama aldı.

Ilajdıń ashılıw máresiminde Qaraqalpaqstan Respublikası Joqarı bilimlendiriw, ilim hám innovaciyalar ministrliginiń wákilleri, instituttıń tiyisli juwapkerleri sózge shıǵıp, elimizde jaslardıń bilim alıwı, kásip-óner úyreniwi ushın jaratılıp atırǵan sharayatlardan nátiyjeli paydalanıwǵa shaqırdı.

Pánler olimpiadasında qatnasıwshılar 10-11-klasslar ushın pán baǵdarlamasına sáykes tayarlanǵan sorawlarǵa juwap beriw arqalı óz bilim hám kónlikpelerin sınaqtan ótkerdi.

Oqıwshılardıń soraw hám tapsırmalar boyınsha bergen juwapların instituttıń tájiriybeli professor-oqıtıwshılarınan dúzilgen tóreshiler quramı aǵzaları ádil túrde bahaladı.

Solay etip, «Ministr kubogi» pánler olimpiadası juwmaǵında jeńimpazlar hám sıylı orın iyeleri anıqlanıp, shólkemlestiriwshiler tárepinen diplom jáne sawǵalar menen sıylıqlandı.

NMPI baspasóz xızmeti.