Ájiniyaz atındaǵı Nókis mámleketlik pedagogikalıq institutında joqarı bilimlendiriw mákemeleriniń joqarı kurslarında oqıtılatuǵın pánlerdiń oqıw baǵdarlamaların sırt el joqarı bilimlendiriw shólkemleriniń bilimlendiriw baǵdarlamaları tiykarında islep shıǵıw máselelerine baǵıshlanǵan seminar shólkemlestirildi.

Ilajǵa Qaraqalpaqstan Respublikasındaǵı mámleketlik joqarı oqıw orınlarınıń oqıw isleri boyınsha prorektorları, oqıw-metodikalıq basqarma baslıqları, fakultet dekanları hám kafedra baslıqları qatnastı.

Seminarda Joqarı bilimlendiriw, ilim hám innovaciyalar ministrliginiń juwapker xızmetkeri Alijon Xójaev qatnasıwshılarǵa ministrliktiń tiyisli protokolınıń mazmunı hám áhmiyeti, onda názerde tutılǵan wazıypalar hám xalıqaralıq reytinglerde joqarı orınlardı iyelegen sırt el joqarı bilimlendiriw mákemeleriniń oqıw baǵdarlamaları menen islesiw tártibi haqqında tolıq maǵlıwmat berdi.

Ilajda 2025-2026-oqıw jılına tayarlıq kóriw procesi dodalandı. Xalıqaralıq reytinglerde «TOP-300»likke kirgen sırt el joqarı bilimlendiriw shólkemleriniń oqıw baǵdarlamaları menen tanısıw hám olardı óz oqıw processlerine engiziw jolları kórip shıǵıldı. Oqıw procesin joqarı sapada shólkemlestiriw, metodikalıq járdem hám innovaciyalıq qatnaslardı engiziw máseleleri dodalandı. Abıroylı xalıqaralıq reytinglerdegi joqarı bilimlendiriw mákemeleriniń metodikaların úyreniw hám olardı respublikadaǵı bilimlendiriw sistemasına beyimlestiriw boyınsha usınıslar berildi.

Seminar juwmaǵında qatnasıwshılar zamanagóy hám xalıqaralıq talaplar tiykarında oqıw baǵdarlamaların islep shıǵıw boyınsha óz ara pikir almastı.

NMPI baspasóz xızmeti.