Xabarıńız bar, Ájiniyaz atındaǵı Nókis mámleketlik pedagogikalıq institutı Shet tilleri fakulteti inglis tili hám ádebiyatı tálim baǵdarınıń 2-kurs studenti Alfiya Amangeldieva «Digital Generation Girls – 2025» tańlawında «Gidrogel járdeminde «EkoAral» jaratıw» joybarı menen qatnasıp, jeńimpaz bolǵan edi.

Tańlaw jeńimpazları bolǵan innovator jaslar AQShta bilimlendiriw sayaxatında bolıp qayttı.

– Ilim, bilimlendiriw hám innovaciyalar boyınsha dúnya júzinde eń joqarı orınlarda turatuǵın Massachusets texnologiyalıq institutı hám Garvard universitetine bolǵan sayaxatlarımız mende úlken tásir qaldırdı. Bul jerdegi sharayatlar hám jaslardıń bilim alıwǵa bolǵan qızıǵıwshılıqları men ushın úlken motivaciya baǵıshladı. Professor-oqıtıwshılar hám dúnyanıń barlıq ellerinen kelgen jaslar menen tanısıp, sáwbetlestik. Álbette, biz, jaslar usınday sayaxatlardan alǵan tájiriybelerimiz, bilimlerimiz benen keleshekte elimizdiń hár tárepleme rawajlanıwı ushın óz úlesimizdi qosıwǵa háreket etemiz, – deydi Alfiya.

Maǵlıwmat ornında atap ótiw kerek, institutımız studenti Alfiya Amangeldieva búgin, 30-iyun – Jaslar kúni múnásibeti menen mámleketimiz basshısınıń Tashkent qalasında ótkerilip atırǵan ushırasıwında qatnaspaqta.

NMPI baspasóz xızmeti.