Ájiniyaz atındaǵı Nókis mámleketlik pedagogikalıq institutında pitkeriwshi studentlerdiń miynet bazarına nátiyjeli kirip barıwın qollap-quwatlaw, olardıń bántligin támiyinlew, sonday-aq, jaslardıń isbilermenlik potencialın rawajlandırıw maqsetinde «Pitkeriwshi bántligi – 2025» joybarı sheńberinde «Karyera kúni» miynet yarmarkası hám «Biznes marafon» seminar-treningi shólkemlestirildi.

Ilajǵa Ózbekstan mámleketlik kórkem óner hám mádeniyat institutı Nókis filialı, Ózbekstan mámleketlik dene tárbiyası hám sport universiteti Nókis filialı, Ózbekstan mámleketlik konservatoriyası Nókis filialı, sonday-aq, instituttıń pitkeriwshi studentleri, juwapker ministrlik hám shólkemler, jumıs beriwshi mákeme, kárxanalar, isbilermenlik subyektleriniń wákilleri qatnastı.

Seminar-treningde dáslep instituttıń ilimiy isler hám innovaciyalar boyınsha prorektorı wazıypasın waqıtsha atqarıwshısı P.Kalxanov sózge shıǵıp, institutta pitkeriwshilerdiń bántligin támiyinlew maqsetinde juwapker ministrlikler menen, sonıń menen birge, «Keleshekke qádem» baǵdarlaması sheńberinde tiyisli bankler tárepinen ámelge asırılıp atırǵan jumıslar haqqında maǵlıwmat berdi.

«Biznes marafon» sheńberinde joqarı nátiyjelerge erisip atırǵan isbilermenler menen ushırasıw ótkerilip, jaslar arasında startap ideyalardı ámeliyatqa engiziw boyınsha master-klasslar hám treningler shólkemlestirildi.

«Karyera kúni» sheńberinde ótkerilgen bos jumıs orınları miynet yarmarkasında pitkeriwshiler jumıs beriwshiler menen júzbe-júz ushırasıp, óz ara sáwbetlesti hám másláhátlesiwler bolıp ótti.

NMPI baspasóz xızmeti.