Búgin, 14-iyul kúni elimiz boylap 2025-2026-oqıw jılı ushın joqarı hám kásiplik bilimlendiriw mákemelerine oqıwǵa kiriw test sınaqları baslandı.

Nókis qalasındaǵı test sınaqları ótkeriletuǵın orınlar qatarında Ájiniyaz atındaǵı Nókis mámleketlik pedagogikalıq institutı sport kompleksinde de abiturientler test sınaqlarına qatnaspaqta.

Bul jerde abiturientlerdiń ata-anaları ushın kútiw orınları, test procesin onlayn baqlaw imkaniyatı, sonday-aq, basqa da zárúr sharayatlar jaratıldı.

Maǵlıwmat ornında atap ótiw kerek, test sınaqları kúnine eki smenada –
1-smena 08:00 den 11:00 ge shekem, al 2-smena 15:00 den 18:00 ge shekem bolıp ótedi.

Qaraqalpaqstan Respublikasında joqarı hám kásiplik bilimlendiriw mákemelerine kiriw test sınaqlarına ulıwma 32 700 den aslam abiturentler qatnasıwı kútilip atırǵan bolıp, test sınaqları usı jıldıń 22-iyul kúnine shekem dawam etedi.

Test sınaqları tolıq videobaqlaw arqalı onlayn translyaciya etilmekte hám processti test2025.uz saytı arqalı onlayn baqlap barıw imkaniyatı jaratılǵan.

NMPI baspasóz xızmeti.