Ájiniyaz atındaǵı Nókis mámleketlik pedagogikalıq institutı jámááti tárepinen elimiz boylap dawam etip atırǵan «Áhmiyetli 90 kún» ilajları sheńberinde Shomanay rayonında koncert baǵdarlaması shólkemlestirildi.

Qaraqalpaqstan Respublikası Joqarı bilimlendiriw, ilim hám innovaciyalar ministrligi tárepinen tastıyıqlanǵan mádeniy-aǵartıwshılıq ilajlar rejesine muwapıq rayondaǵı «EkoPark» dem alıw orayında ótkerilgen ilajǵa rayon hákimligi hám mádeniyat bólimi wákilleri, instituttıń muzıkalıq tálim kafedrasınıń professor-oqıtıwshıları, «Tumaris» xalıq ansambli aǵzaları hám talantlı studentler, rayon turǵınları qatnastı.

Mádeniy-kewilashar baǵdarda bolıp ótken ilaj dawamında instituttıń talantlı studentleri qosıq hám ayaq-oyınlar atqarıp, rayon xalqı, sonıń ishinde, jaslardıń kewillerine kóterińkilik baǵıshladı.

Koncert dawamında rayonda jaslar arasında ótkerilgen birneshe tańlaw hám jarıslardıń jeńimpazları xoshametlendi.

NMPI baspasóz xızmeti.