Ájiniyaz atındaǵı Nókis mámleketlik pedagogikalıq institutınıń oqıw-dala ámeliyatı ornında respublikamızdaǵı joqarı oqıw orınları studentleri ushın shólkemlestirilgen «Studentler jazǵı lageri»niń ekinshi gezegi óz jumısın basladı.

Instituttıń Fizika-matematika, Baslawısh tálim hám Pedagogika fakultetleri juwapkerleri tárepinen bul jerde dem alıp atırǵan studentler qatnasıwında 30-iyul – Xalıqlar doslıǵı kúni múnásibeti menen mádeniy-aǵartıwshılıq ilajı shólkemlestirildi.

Ilajda qaraqalpaq, ózbek, qazaq, túrkmen hám basqa da millet wákilleri bolǵan jaslar óz ara doslıq, tatıwlıq hám awızbirshilik ruwxında jámlesip, óz qábiletlerin kórsetti jáne milliy kiyimlerde qosıqlar atqardı.

Jaslar ata-babalarımızdan miyras bolıp kiyatırǵan milliy qádiriyatlar, úrp-ádetler, dástúrler, qosıqlar, ayaq-oyınlar haqqında maǵlıwmat almasıp, sáwbetlesiwler ótkerdi.

Ilaj dawamında jaslarǵa xalıqlar arasındaǵı doslıqtı bekkemlew, keńpeyillik, milletler aralıq tatıwlıq hám awızbirshiliktiń áhmiyeti tuwralı maǵlıwmatlar berildi.

NMPI baspasóz xızmeti.