Xabarıńız bar, usı jıldıń 8-11-iyul kúnleri aralıǵında Ájiniyaz atındaǵı Nókis mámleketlik pedagogikalıq institutında 2025-2026-oqıw jılı ushın qabıllaw procesinde bakalavriattıń ayrıqsha qábilet talap etiletuǵın tálim baǵdarlarında kásiplik (dóretiwshilik) imtixanlar bolıp ótti. Institut qabıllaw komissiyası tárepinen usı imtixanlardı shólkemlestiriw hám ótkeriw menen baylanıslı ámelge asırılǵan jumıslardıń nátiyjelerine arnalǵan ashıq sáwbetlesiw bolıp ótti.

Ilajda qabıllaw komissiyasınıń juwaplı xatkeri Abat Berdibaev imtixanlar bir kúnde eki smenada: dene mádeniyatı tálim baǵdarı boyınsha saat 06:00 hám 17:00 de, muzıkalıq tálim, súwretlew óneri hám injenerlik grafikası tálim baǵdarları boyınsha saat 08:30 hám 14:00 de ótkerilgenligin atap ótti.

Sonıń ishinde, dene mádeniyatı, muzıkalıq tálim, súwretlew óneri hám injenerlik grafikası tálim baǵdarları boyınsha ótkerilgen imtixanlardıń belgilengen talaplar tiykarında ádil hám ashıq-aydın ótiwi Qaraqalpaqstan Respublikası Joqarǵı Keńesi deputatları, jámiyetlik shólkemler, siyasiy partiyalar, ǵalaba xabar quralları, sonıń menen birge, tiyisli ministrlik hám shólkemlerden biriktirilgen wákiller tárepinen qadaǵalawǵa alındı.

Imtixanlardıń barısı Internet tarmaǵı arqalı ata-analar hám keń jámiyetshilik wákillerine tikkeley alıp kórsetildi.

Abiturientlerdiń bilim hám kónlikpelerin bahalaw ushın Ózbekstannıń túrli oqıw orınlarınan, atap aytqanda, Ózbekstan milliy pedagogikalıq universiteti, Jizzaq hám Shırshıq mámleketlik pedagogikalıq universitetleri, sonday-aq, Úrgenish, Buxara, hám Termiz mámleketlik pedagogikalıq institutlarınan tájiriybeli professor-oqıtıwshılar jáne qánigeler biriktirilip, olar tárepinen hár bir abiturienttiń tayarlıǵı ádil túrde bahalandı hám toplaǵan balları sol waqıttıń ózinde málim etildi.

Bıyılǵı jılı Nókis mámleketlik pedagogikalıq institutında bakalavriattıń dene mádeniyatı, muzıkalıq tálim, súwretlew óneri hám injenerlik grafikası tálim baǵdarları boyınsha ulıwma 408 abiturient kásiplik (dóretiwshilik) imtixanların tapsırdı.

Áhmiyetlisi, kásiplik (dóretiwshilik) imtixanlardıń nátiyjeleri imtixan ótkerilgen kúnniń ózinde instituttıń rásmiy veb-saytı hám sociallıq tarmaqlardaǵı rásmiy kanalları arqalı járiyalanıp barıldı.

2025-2026-oqıw jılı ushın qabıllaw procesinde kásiplik (dóretiwshilik) imtixanlar boyınsha apellyaciyalıq shaǵımlardı kórip shıǵıw ushın instituttıń apellyaciyalıq komissiyası shólkemlestirilip, imtixan nátiyjeleri járiyalanǵannan baslap 24 saat ishinde qabıl etiw hám kórip shıǵıw jolǵa qoyıldı.

Institutta ótkerilgen kásiplik (dóretiwshilik) imtixanlardıń nátiyjeleri tiyisli tártipte rásmiylestirilip, Bilimdi bahalaw agentligine jiberildi.

NMPI baspasóz xızmeti.