Búgin, 15-avgust kúni Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov Qaraqalpaqstan Respublikasına xızmet saparı sheńberinde Berdaq atındaǵı Qaraqalpaq mámleketlik universitetinde joqarı hám kásiplik bilimlendiriw mákemeleriniń basshıları menen ushırastı.

Ushırasıwǵa Qaraqalpaqstan Respublikası Joqarǵı Keńesiniń komitet baslıǵı Murat Atamuratov, Ministrler Keńesi Baslıǵınıń orınbasarı Bayrambay Otemuratov, ministrlikler hám shólkemlerdiń basshıları, sonday-aq, juwapker wákilleri qatnastı.

Kún tártibine muwapıq, dáslep shólkemlestiriw máselesi kórip shıǵılıp, Qaraqalpaqstan Respublikası Joqarı bilimlendiriw, ilim hám innovaciyalar ministri lawazımına Ayapov Amanjol Tlepovich tayınlanǵanlıǵı málim etildi.

Atap ótiw kerek, Amanjol Ayapov tayınlawǵa shekem Ózbekstan mámleketlik kórkem óner hám mádeniyat institutı Nókis filialınıń direktorı sıpatında jumıs islegen.

Bunnan soń ilajda joqarı oqıw orınlarınıń pitkeriwshi studentleri, sonıń menen birge, kásiplik bilimlendiriw mákemeleriniń pitkeriwshi oqıwshılarınıń bántligin támiyinlew baǵdarında ámelge asırılıp atırǵan jumıslar kórip shıǵıldı. Bul baǵdarda orın alıp atırǵan kemshilikler atap ótilip, mashqalalardı saplastırıw boyınsha juwapkerlerge tiyisli tapsırmalar berildi.

Ministr Qońıratbay Sharipov Prezidentimiz basshılıǵında joqarı oqıw orınları pitkeriwshileriniń bántligin támiyinlew boyınsha ótkerilgen keńeytilgen májiliste belgilep berilgen wazıypalardıń orınlanıwın támiyinlewde jumıs beriwshiler, óndirislik kárxanalar menen birge islesiwdiń áhmiyetine toqtaldı. Bul baǵdardaǵı jumıslardı bunnan bılay da jetilistiriw hám muwapıqlastırıw maqsetinde pitkeriwshilerdiń bántligin támiyinlew shtabı shólkemlestiriletuǵınlıǵın atap ótti.

Ushırasıwda jumıs beriwshi tiyisli ministrlikler hám kárxanalar, sonday-aq, joqarı hám kásiplik bilimlendiriw mákemeleri tárepinen birgelikte ámelge asırılatuǵın jumıslar, sonıń menen birge, jańa oqıw jılına puqta tayarlıqlar kóriw máseleleri belgilep alındı.

NMPI baspasóz xızmeti.