Búgin, 19-avgust kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasında ótkeriliwi jobalastırılǵan «Kiberortalıqta júz berip atırǵan jınayatlardıń aldın alıw boyınsha úgit-násiyat hápteligi (Cyber Week)» ilajları haqqında keń jámiyetshilik wákillerine maǵlıwmat beriw maqsetinde baspasóz konferenciyası shólkemlestirildi.

Ilajǵa Qaraqalpaqstan Respublikası Ministrler Keńesi, Ózbekstan Respublikası Oraylıq banki, Ishki isler ministrligi, ministrliktiń Kiberqáwipsizlik orayı hám «Birden-bir ulıwma respublikalıq processing orayı» AJ «UzCard» jámiyetiniń juwaplı xızmetkerleri, sonday-aq, ǵalaba xabar quralları wákilleri, kárxana hám shólkemlerdiń málimleme xızmeti basshıları, jurnalistler, blogerler qatnastı.

Baspasóz konferenciyasında sózge shıqqanlar elimizde sanlı texnologiyalar hár bir tarawǵa keńnen engizilip, puqaralarımızdıń internet tarmaqlarınan paydalanıwı ushın zárúr sharayatlar jaratılıp atırǵan búgingidey dáwir hár bir kiberortalıq paydalanıwshısınan ózleriniń jeke maǵlıwmatlarınıń jáne bank kartası esap betlerindegi múlkiniń qáwipsizligin támiyinlewde juwapkershilikti arttırıwdı talap etip atırǵanlıǵın atap ótti.

Óytkeni, kóplegen puqaralarımız internettegi aldawshılardıń jalǵan maǵlıwmatlarına isenip, bilip-bilmesten jeke hám bank kartasınıń maǵlıwmatların beriwi aqıbetinde hám materiallıq, hám ruwxıy jaqtan zıyan kórip atırǵanı jiyi baqlanbaqta.

Elimizde 2019-jılda málimleme texnologiyaları arqalı 18 túrdegi 863 jınayat ámelge asırılǵan bolsa, 2024-jılda 62 túrdegi 58 mıń 800 jınayat dizimge alınǵanlıǵı, 2023-jılda kiberjınayatlardıń ulıwma jınayatshılıqtaǵı úlesi 6,2 procentti quraǵan bolsa, 2024-jılda bul kórsetkish 44,4 procentke jetkenligi bul máseleniń oǵada úlken jámiyetlik áhmiyetke iye ekenliginen dárek beredi.

Ilajda ǵalaba xabar quralları hám málimleme xızmeti wákilleri, jurnalistler hám blogerler kún tártibindegi másele boyınsha ózlerin qızıqtırǵan jáne múrájatshı puqaralar tárepinen berilip atırǵan sorawlarǵa qánigelerden tolıq juwaplar aldı.

Konferenciyada usınday jınayatlardıń erte aldın alıw boyınsha puqaralardıń zamanagóy kiberqáwipler haqqındaǵı bilim hám kónlikpelerin arttırıwda ǵalaba xabar quralları wákilleri menen birgelikte ámelge asırılatuǵın jumıslar belgilep alındı.

NMPI baspasóz xızmeti.