Assalawma áleykum, húrmetli ustazlar, áziz studentler hám qádirli kásiplesler!

Hámmeńizdi Watanımız turmısındaǵı eń ullı hám qádirli sánelerdiń biri – Ózbekstan Respublikası ǵárezsizliginiń 34 jıllıq bayramı menen shın júrekten qutlıqlayman!

Ǵárezsizlik bizge óz táǵdirimizdi óz qolımız benen belgilew, milliy qádiriyatlarımızdı tiklew, bilimlendiriw hám ilim tarawların rawajlandırıw, keleshek áwlad ushın abadan turmıs jaratıw sıyaqlı sheksiz imkaniyatlardı berdi. Búgin Watanımız rawajlanıwınıń barlıq basqıshlarında qolǵa kirgizilip atırǵan úlken nátiyjeler, xalqımızdıń erteńgi kúnge bolǵan isenimi, jaslarımızdıń arzıw-umtılısları ǵárezsizligimizdiń tiykarında ámelge aspaqta.

Sońǵı jıllarda tarawdaǵı reformalar nátiyjesinde respublikamızda jumıs alıp barıp atırǵan mámleketlik hám mámleketlik emes joqarı oqıw orınlarınıń sanı derlik eki esege arttı. 2016-jılı bir ǵana Qaraqalpaqstan Respublikasında joqarı oqıw orınlarınıń sanı 6 bolǵan bolsa, házirgi waqıtta olardıń sanı 11 ge jetti.

Álbette, bulardıń barlıǵı mámleketimizde joqarı bilimlendiriw tarawına qaratılıp atırǵan dıqqat-itibardıń ámeliy nátiyjeleri bolıp tabıladı.

Usı orında biziń oqıw dárgayımız da mámleketimizdiń rawajlanıwına múnásip úles qosıp atırǵanın ayrıqsha atap ótiwimiz kerek. Institutımızda ilimiy izleniwler, innovaciyalıq ideyalar hám jańa qatnas tiykarında jaslarımızdı Watanımızdıń rawajlanıwı ushın bilimli, intáker hám pidayı kadrlar etip tárbiyalaw jolında sistemalı jumıslar ámelge asırılmaqta.

Húrmetli professor-oqıtıwshılar, áziz student-jaslar! Jáne bir márte sizlerdi biziń arzıwlarımız, imkaniyatlarımız hám keleshegimiz bolǵan ǵárezsizlik bayramı menen qutlıqlay otırıp, barlıq iygilikli tileklerińizdiń ámelge asıwın, elimiz tınısh, aspanımız ashıq, suwımız mol, xalqımızdıń turmısı abadan bolıwın tileymen!

Húrmet penen,
Alisher Ubbiyev,
Ájiniyaz atındaǵı Nókis mámleketlik pedagogikalıq institutı rektorı.