Búgin, 4-sentyabr kúni Ájiniyaz atındaǵı Nókis mámleketlik pedagogikalıq institutında «Bes baslama olimpiadası» jaslar festivalı sheńberinde «Rektor hám jaslar» ushırasıwı shólkemlestirildi.

Ilajǵa institut rektorı Alisher Ubbiyev, jaslar awqamı baslanǵısh shólkemi jetekshisi Bayrambay Gúlimbetov, jaslar awqamınıń belsendi aǵzaları, bıyılǵı oqıw jılında institutqa oqıwǵa usınıs etilgen student-jaslar qatnastı.

Ushırasıw dawamında studentlerdiń oqıw procesi, ilimiy izleniwler, turaq jay menen támiyinlew máseleleri, bos waqtın nátiyjeli ótkeriw, sonday-aq, sport hám mádeniy ilajlarda belsene qatnasıw imkaniyatları boyınsha pikir-usınıslar bildirildi.

Rektor studentler menen ashıq sáwbetlesiw ótkerip, olarǵa jaratılıp atırǵan sharayatlar, ilimiy hám dóretiwshilik joybarlarda belsene qatnasıw, shet tillerin tereń úyreniw, sonday-aq, kásiplik sheberliklerin arttırıw boyınsha másláhátlerin berdi.

Ilaj sońında jaslardıń baslamaları qollap-quwatlanatuǵınlıǵı, olardıń bilim alıwı hám qábiletlerin rawajlandırıwı ushın barlıq sharayatlar jaratılıwı atap ótildi.

NMPI baspasóz xızmeti.