Búgin, 8-sentyabr kúni Ájiniyaz atındaǵı Nókis mámleketlik pedagogikalıq institutında jańa oqıw jılında jaslar tálim-tárbiyası baǵdarında ámelge asırılatuǵın jumıslardı belgilep alıwǵa arnalǵan májilis bolıp ótti.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Májilis dawamında studentlerdiń bilim alıw procesin bunnan bılay da sapalı shólkemlestiriw, olardıń bos waqtın mazmunlı ótkeriw, ruwxıy-aǵartıwshılıq tárbiyanı kúsheytiw, hár qıylı sociallıq-ruwxıy ilajlardı nátiyjeli ótkeriw máseleleri kórip shıǵıldı. Sonday-aq, jaslar arasında kitapqumarlıqtı úgit-násiyatlaw, salamat turmıs tárizin engiziw, qábiletli studentlerdi qollap-quwatlaw hám olardıń baslamaların xoshametlew boyınsha juwapkerlerge anıq wazıypalar belgilep berildi.

Májiliste tiyisli bólimlerdiń basshıları, fakultet dekanlarınıń orınbasarları, jaslar jetekshileri hám tyutorlar qatnasıp, óz pikir-usınısların bildirdi.

Ilaj sońında belgilengen wazıypalardıń óz waqtında hám nátiyjeli ámelge asırılıwı institutta tálim-tárbiya procesin jańa basqıshqa kóteriwi ayrıqsha atap ótildi.

NMPI baspasóz xızmeti.