Búgin, 10-sentyabr kúni Ájiniyaz atındaǵı Nókis mámleketlik pedagogikalıq institutında «Plato Books», «Booky», «Atiyaj» juwapkershiligi sheklengen jámiyetleri hám «Aydınlar» joybarı tárepinen finanslıq sawatlılıq boyınsha qaraqalpaq tiline awdarılǵan Bodo Sheferdiń «Pul álipbesi», Jorj S.Kleysonnıń «Vavilonnıń eń bay adamı», Saidmurod Davlatovtıń «Men hám pul» hám «Pikirlew strategiyası» kitapların keń jámiyetshilikke tanıstırıwǵa arnalǵan ilaj bolıp ótti.

Qaraqalpaqstan Respublikası Joqarǵı Keńesi hám Ministrler Keńesi, Jaslar isleri agentligi Qaraqalpaqstan Respublikası basqarması, Ministrler Keńesi janındaǵı Mámleketlik tildi rawajlandırıw departamenti, sonday-aq, «Plato Books», «Booky», «Kaypanov» jámiyetleri tárepinen shólkemlestirilgen ilajǵa belgili aǵartıwshı ziyalılar, ustaz pedagoglar, kitapqumar jaslar, studentler, keń jámiyetshilik hám ǵalaba xabar quralları wákilleri qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov kiris sózi menen ashıp berdi.

Jańa kitaplardıń tanıstırıw keshesinde sociologiya ilimleri boyınsha filosofiya doktorı Rustam Saparbaev, isbilermen Azamat Kaypanov, «Booky» joybarınıń tiykarın salıwshısı Azizbek Dabılovlar sózge shıǵıp, xalqımızdıń kitap oqıwǵa bolǵan qızıǵıwshılıǵınan kelip shıǵıp, olardıń turmıs dárejesin arttırıw maqsetinde ámelge asırılǵan bul ilajlardıń áhmiyeti tuwralı maǵlıwmat berdi.

Sonıń menen birge, qaraqalpaq tilinde basıp shıǵarılǵan kitaplardıń mazmunı menen tanıstırıp, olardan hár bir insan jeke ómirinde paydalanıwı múmkinligin atap ótti.

Ilaj jańa kitaplardıń yarmarkası menen dawam etti.

NMPI baspasóz xızmeti.