Búgin, 10-sentyabr kúni Ájiniyaz atındaǵı Nókis mámleketlik pedagogikalıq institutında pitkeriwshi jaslardıń aldaǵı jumısları, olardıń miynet bazarında múnásip orın iyelewi hám bántligin támiyinlew máselelerine arnalǵan ushırasıw shólkemlestirildi.

Ushırasıwǵa fakultetlerdiń dekanları, kafedralar hám tiyisli bólimlerdiń basshıları, juwapker qánigeler, sonday-aq, 2024-2025-oqıw jılında instituttı pitkergen jaslar qatnastı.

Ilajda institut rektorı Alisher Ubbiyev jaslar bántligin támiyinlew, olardıń óz qánigelikleri boyınsha kásiplik jumısların dawam ettiriwi ushın ámelge asırılıp atırǵan jumıslar haqqında maǵlıwmat berdi.

Atap ótilgenindey, ótken 2024-2025-oqıw jılında instituttı ulıwma 4369 student pitkerip shıqqan bolsa, búgingi kúnge shekem olardıń 68 procentten aslamınıń bántligi támiyinlendi. Sonıń menen birge, pitkeriwshi jaslar arasınan 49 student «Keleshekke qádem» joybarı tiykarında 1 milliard 200 million sumǵa shamalas jeńilletilgen kredit alıp, óz isbilermenlik jumısların alıp barmaqta.

Ushırasıwda institut rektorı «Oqıwshılardı qosımsha bilimlendiriwge tartıw sisteması» arqalı pitkeriwshilerdiń bántligin támiyinlewdiń áhmiyeti tuwralı maǵlıwmat berip, juwapkerlerge tiyisli tapsırmalar berdi.

NMPI baspasóz xızmeti.