Búgin, 11-sentyabr kúni Ájiniyaz atındaǵı Nókis mámleketlik pedagogikalıq institutı málimleme-resurs orayında belgili qazaq oyshılı, shayır hám aǵartıwshı Abay Qunanbay ulınıń tuwılǵanına 180 jıl tolıwına arnalǵan «Óleń – sózdiń patshası, sóz sarası» atamasındaǵı ádebiy keshe bolıp ótti.

Ádebiy keshege instituttıń qazaq, túrkmen tili hám ádebiyatı kafedrasınıń baslıǵı, docent Írıstı Quttımuratova, usı kafedra docenti Tursınay Tórtkúlbaeva, Qaraqalpaqstan Respublikası málimleme-kitapxana orayı ulıwma oqıw zalı sektorınıń baslıǵı Bolǵanay Óteniyazova, elektron resurslardan paydalanıw hám oqıw zalları baslıǵı Jibek Tilewbaeva, professor-oqıtıwshılar, tyutorlar hám ádebiyat ıqlasbentleri bolǵan student-jaslar qatnastı.

Ilajdı málimleme-resurs orayınıń sırt el málimleme-kitapxana resursları menen islew bóliminiń baslıǵı Rita Amanbaeva kiris sózi menen ashıp berdi.

Keshede sózge shıqqanlar Abaydıń bay dóretiwshilik miyrası, onıń ulıwma adamgershilik ideyaları, xalıqtıń ruwxıy dárejesi hám mádeniyatın jetilistiriwdegi ornı haqqında maǵlıwmatlar berdi.

Studentler tárepinen shayırdıń qosıqları, qarasózleri atqarıldı.

Bul ádebiy keshe jaslardıń kewilinde ulıwma adamzatqa ortaq bolǵan ádebiy miyraslardı qádirlew hám tereń úyreniw sezimlerin payda etiwge xızmet etti.

NMPI baspasóz xızmeti.