AQSh Mámleketlik departamentiniń Inglis tili boyınsha regionallıq wákili Nargiza Nugmanova hám «English Language Fellow» baǵdarlaması boyınsha inglis tili oqıtıwshısı Marin Ekstrom Ájiniyaz atındaǵı Nókis mámleketlik pedagogikalıq institutına keldi.

Instituttıń oqıw isleri boyınsha prorektorı Muxtar Ibragimov hám filologiya fakultetiniń tiyisli juwapkerleri menen bolıp ótken ushırasıwda xalıqaralıq bilimlendiriw joybarları sheńberinde óz ara birge islesiwdi bunnan bılay da rawajlandırıw, student-jaslardıń inglis tilin tereń úyreniwine kómeklesiw, professor-oqıtıwshılar menen ilimiy-pedagogikalıq baǵdarda nátiyjeli birge islesiw máseleleri dodalandı.

Inglis tili boyınsha sırt elli qánigeniń institutta aldaǵı waqıtlarda jumıs alıp barıwı inglis tilin oqıtıw sapasın arttırıw, akademiyalıq baylanıslardı keńeytiw hám instituttıń xalıqaralıq baylanısların bekkemlewge xızmet etetuǵınlıǵı atap ótildi.

Xalıqaralıq baǵdarlama sheńberinde kelgen qánigeler bildirilgen pikir-usınıslar hám joqarı dárejede kútip alǵanı ushın institut jámáátine minnetdarshılıq bildirdi. Miymanlar inglis tili hám ádebiyatı kafedrasınıń professor-oqıtıwshıları hám student-jaslar menen sáwbetlesip, aldaǵı birgelikte ámelge asırılatuǵın jumıslardı belgilep aldı.

NMPI baspasóz xızmeti.