Húrmetli studentler, magistrantlar hám doktorantlar! Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Innovaciyalıq rawajlanıw agentligi tárepinen «Akademiyalıq háreketsheńlik» baǵdarlaması tańlawında qatnasıw ushın joybarlardı qabıllaw dawam etpekte.

Joybarlar «Akademiyalıq háreketsheńlik» baǵdarlaması arnawlı elektron platforması arqalı onlayn qabıl etiledi.

Bul baǵdarlama jas ilimpazlarǵa ilimiy shólkem hám joqarı bilimlendiriw mákemeleriniń qunlı ilimiy obyektleri, zamanagóy ilimiy laboratoriya hám tájiriybe-konstruktorlıq byurolarınan biypul paydalanıw huqıqın beredi.

Baǵdarlamada qatnasıw ushın qoyılatuǵın shártler:

1. Joybar orınlawshısınıń jası olardıń ilimiy dárejesi, ataǵı, lawazımı hám jumıs ornına qaramastan 40 jastan aspawı;
2. 1 qatnasıwshı 1 ilimiy joybar menen qatnasıwı;
3. Usınılǵan ilimiy joybardıń summası bazalıq esaplaw muǵdarınıń 200 esesinen aspawı;
4. Baǵdarlamanı ámelge asırıw múddeti 1 aydan 6 ayǵa shekem bolıwı.

Kerekli hújjetler:

1. Talaban jumıs alıp barıp atırǵan mákeme jollama xatı;
2. Ilimiy-izertlew joybarı (joybar kalendar-rejesi, joybar qárejetler smetası);
3. Talabanlardıń joybarları olar jumıs alıp barıp atırǵan mákemelerdiń ilimiy yamasa ilimiy-texnikalıq keńesleri tárepinen tastıyıqlanǵan bolıwı kerek;
4. Joybarǵa talabannıń maǵlıwmatnama-obyektivkası (anketa) qosımsha etiledi;
5. Basıp shıǵarılǵan ilimiy jumıslar dizimi talabannıń ilimiy basshısı tárepinen tastıyıqlanadı;
6. Qabıl etiwshi shólkemniń kelisim xatı Innovaciyalıq rawajlanıw agentliginiń atına (shólkemniń rásmiy blankasında hám shólkemniń birinshi basshısı tárepinen qol qoyılǵan bolıwı shárt);
7. Ilimiy joybardıń prezentaciyası (10 slaydtan aspawı kerek).

Usınılǵan ilimiy joybarlardaǵı maǵlıwmatlardıń haqıyqıylıǵı hám isenimliligi, tańlaw baǵdarlamalarınıń wazıypalarında belgilengen, kútilip atırǵan nátiyjelerdiń tolıq hám óz waqtında sapalı orınlanıwına ilimiy joybar avtorları jeke juwapker esaplanadı.

Joybarlardı ámelge asırıw menen baylanıslı barlıq qárejetler mámleket tárepinen tolıq qaplap beriledi.

Tańlawǵa usınılatuǵın joybarlar Ministrler Kabinetiniń 2021-jıl 19-apreldegi 222-sanlı qararına qosımsha «Akademiyalıq háreketsheńlik» baǵdarlamasın qáliplestiriw, ámelge asırıw, qarjılandırıw hám monitoring etiw tártibi haqqındaǵı Reje talaplarına muwapıq bolıwı shárt.

Hújjetler 2025-jıl 1-oktyabrge shekem qabıl etiledi.

Tańlaw nátiyjelerine bola jeńimpaz dep tabılǵan joybarlar 2026-jıl yanvar ayınan baslap qarjılandırıladı.

Múrájat ushın telefon: +998996632547