Ájiniyaz atındaǵı Nókis mámleketlik pedagogikalıq institutında «Studentler qáwipsizligi aylıǵı» sheńberinde jaslar arasında jınayatshılıq hám huqıqbuzarlıqlardıń aldın alıw, házirgi waqıtta mámleketimiz tárepinen jaslardıń bilim alıwı, óz qábiletlerin júzege shıǵarıwı ushın jaratılıp atırǵan sharayatlar haqqında studentler menen pikir almasıw maqsetinde ushırasıw bolıp ótti.

Ushırasıwǵa Ózbekstan «Milliy tiklanish» demokratiyalıq partiyası Oraylıq Keńesi jaslar qanatınıń baslıǵı, Oliy Majlis Nızamshılıq palatası janındaǵı Jaslar parlamentiniń aǵzası Nodirbek Muradov, Qaraqalpaqstan Respublikası Joqarǵı Keńesi janındaǵı Jaslar parlamentiniń aǵzası Dáwletbek Jańabaev, instituttıń belsendi studentleri qatnastı.

Ilajda instituttıń jaslar menen islesiw, ruwxıylıq hám aǵartıwshılıq bóliminiń baslıǵı Aybek Bazarbaev hám miymanlar sózge shıǵıp, elimizde jaslarǵa baylanıslı mámleketlik siyasattıń baslı baǵdarları, tarawlarda ámelge asırılıp atırǵan reformalardıń mazmunı hám áhmiyeti, sonday-aq, «Erjetpegenler arasında qadaǵalawsızlıq hám huqıqbuzarlıqlardıń profilaktikası haqqındaǵı» Ózbekstan Respublikasınıń nızamı haqqında maǵlıwmatlar berdi. Jaslar ushırasıw dawamında ózlerin qızıqtırǵan sorawlarǵa juwap aldı.

NMPI baspasóz xızmeti.