Búgin, 19-sentyabr kúni Ájiniyaz atındaǵı Nókis mámleketlik pedagogikalıq institutında student-jaslardıń innovaciyalıq ideyaların qollap-quwatlaw hám olardı startap joybarlardı jaratıwǵa keńnen tartıw maqsetinde seminar-trening shólkemlestirildi.

Seminar-treningde institut professor-oqıtıwshıları, tarawda nátiyjeli jumıs alıp barıp atırǵan tájiriybeli qánigeler hám innovaciyalıq joybarlarǵa qızıǵıwshılıǵı bolǵan studentler qatnastı.

Ilajda instituttıń ilimiy isler hám innovaciyalar boyınsha prorektorı Quwanıshbay Seytnazarov sózge shıǵıp, startap túsinigi, onıń basqıshları, tabıslı joybarlardı ámelge asırıwǵa zárúr bolǵan bilim hám kónlikpeler haqqında tolıq maǵlıwmat berdi.

Seminar dawamında «Startup Garage» regionallıq joybarınıń menedjeri Axmet Uzaqbaev jańa ideyalardı tabıslı joybarlarǵa aylandırıw jolları, bazar analizi hám investorlar menen islesiw, «Startup Garage» platformasınıń imkaniyatları, mentorlıq, grantlar hám qollap-quwatlaw baǵdarlamaları boyınsha qatnasıwshılarǵa zárúr kónlikpeler berdi.

Sonday-aq, studentler óz innovaciyalıq ideya hám joybarların tanıstırıp, qánigelerdiń usınıs hám másláhátlerin aldı.

Ilaj jaslardıń dóretiwshilik qábiletin júzege shıǵarıw, olardıń biznes hám ilimiy joybarların ámelge asırıw baǵdarındaǵı umtılısların qollap-quwatlawǵa xızmet etti.

NMPI baspasóz xızmeti.