Ózbekstan Ekologiyalıq partiyası Qaraqalpaqstan Respublikası partiya shólkemi tárepinen sentyabr-oktyabr aylarına belgilengen «Ekologiya hám jaslar» aylıǵı sheńberinde Ájiniyaz atındaǵı Nókis mámleketlik pedagogikalıq institutında «Ekologiyalıq ádetler turmıstı ózgertedi» atamasında seminar shólkemlestirildi.

Seminarda instituttıń jaslar menen islesiw, ruwxıylıq hám aǵartıwshılıq bóliminiń baslıǵı Aybek Bazarbaev shıǵıp sóylep, búgingi kúnde student-jaslardıń ekologiyalıq mádeniyatın arttırıw, olardı qorshaǵan ortalıqtı saqlawǵa keńnen tartıw máselelerine ayrıqsha toqtap ótti.

Sonday-aq, «Ekologiya hám salamatlıq» hayal-qızlar klubı Keńesiniń baslıǵı Aydana Abdraxmanova shıǵıp sóylep, ekologiyalıq ádetlerdiń kúndelikli turmıstaǵı ornı haqqında tolıq maǵlıwmat berdi. Ol shıǵındılardı durıs ajıratıw, qayta islew, energiya hám suwdan aqılǵa uǵras paydalanıw, terek egiw, plastikalıq ónimlerden paydalanıwdı azaytıw sıyaqlı ámeliy ádetler insan turmıs sapasın arttırıw hám jámiyette ekologiyalıq ortalıqtı jaqsılawǵa xızmet etetuǵının atap ótti.

Ilaj dawamında ekologiyalıq temalarda prezentaciyalar, soraw-juwaplar hám studentlerdiń pikir-usınısları tıńlandı. Sonday-aq, jaslar tárepinen ekologiyalıq úgit-násiyatlawǵa baylanıslı baslamalar alǵa qoyıldı.

Seminarda qatnasqanlar ekologiyalıq ádetlerdi kúndelikli turmısqa engiziw hám bul baǵdarda átiraptaǵılarǵa unamlı úlgi bolıw zárúrligin atap ótti. Belsendi qatnasqan jaslarǵa húrmet jarlıǵı tapsırıldı.

NMPI baspasóz xızmeti.