Búgin, 20-sentyabr kúni Ájiniyaz atındaǵı Nókis mámleketlik pedagogikalıq institutında respublikamızdaǵı pedagogikalıq joqarı oqıw orınları ilimiy isler hám innovaciyalar boyınsha prorektorları keńesiniń ekinshi jıynalısı bolıp ótti.

Ózbekstan Respublikası Mektepke shekemgi hám mektep bilimlendiriwi ministriniń «Pedagogikalıq joqarı bilimlendiriw mákemeleriniń rejesi hám shólkemlestiriw strukturasın tastıyıqlaw jáne prorektorlar keńesleriniń jumısların jolǵa qoyıw haqqında»ǵı buyrıǵında belgilengen wazıypalardıń orınlanıwın támiyinlew maqsetinde shólkemlestirilgen ilajǵa barlıq pedagogikalıq joqarı oqıw orınlarınıń prorektorları onlayn formatta qatnastı.

Jıynalıs kún tártibine muwapıq, dáslep instituttıń ilimiy isler hám innovaciyalar boyınsha prorektorı Quwanıshbay Seytnazarov institutta ilimiy-innovaciyalıq jumıslardıń házirgi jaǵdayı hám perspektivaları boyınsha bayanat jasadı.

Sonday-aq, jıynalısta 2026-jıl ushın tayanısh doktorantura, doktorantura, stajyor-izleniwshilik hám erkin izleniwshilikke kiriw imtixanları jáne sáwbet processlerin ótkeriw tártibin jetilistiriw, xalıqaralıq joybarlardı ámelge asırıw jumısların basqarıw hám joqarı nátiyjege erisiwdi támiyinlew máseleleri boyınsha tiyisli bayanatlar tıńlandı.

Ilaj sońında prorektor Quwanıshbay Seytnazarov óz ilimiy basshılıǵında ámelge asırılıp atırǵan ilimiy-innovaciyalıq joybarlardı kelgen miymanlarǵa tanıstırdı.

NMPI baspasóz xızmeti.