Usı jıldıń 25-sentyabr kúni Ájiniyaz atındaǵı Nókis mámleketlik pedagogikalıq institutında 2025-2026-oqıw jılı ushın qabıllaw procesiniń juwmaqları hám jańa oqıw jılında ámelge asırılatuǵın jumıslarǵa arnalǵan baspasóz konferenciyası bolıp ótti.

Baspasóz konferenciyasına institut rektorı Alisher Ubbiyev, barlıq prorektorlar, qabıllaw komissiyasınıń tiyisli juwapkerleri, respublikalıq hám jergilikli ǵalaba xabar quralları wákilleri, jurnalistler, sonday-aq, blogerler qatnastı.

Ilajda institut rektorı ǵalaba xabar quralları xızmetkerlerine jańa oqıw jılına qabıllaw procesiniń juwmaqları hám ilimiy-pedagogikalıq, innovaciyalıq jáne oqıw-tárbiyalıq baǵdarda ámelge asırılatuǵın aldaǵı rejeler tuwralı maǵlıwmat berdi.

Atap ótilgenindey, 2025-2026-oqıw jılı ushın institutta ulıwma 26 kúndizgi bakalavriat tálim baǵdarı ushın jámi 1660 orın, 13 keshki bakalavriat tálim baǵdarı ushın jámi 360 orın, sonday-aq, 24 magistratura qánigeligi ushın 171 orın ajıratıldı.

Ayrıqsha qábilet talap etiletuǵın tálim baǵdarları ushın 8-11-iyul kúnleri kásiplik (dóretiwshilik) imtixanları, 14-22-iyul kúnleri bakalavriat tálim baǵdarlarına kiriw test imtixanları belgilengen talaplar tiykarında joqarı shólkemleskenlik penen ótkerildi.

Sonıń menen birge, sırt el hám mámleketlik emes joqarı oqıw orınlarınan oqıwdı kóshiriw boyınsha test imtixanı, texnikumlardı tabıslı tamamlaǵan oqıwshılardı, sonday-aq, ekinshi hám onnan keyingi joqarı bilimlendiriw boyınsha talabanlardı sáwbet tiykarında qabıllaw imtixanları bolıp ótti.

Búgingi kúnde institutta bakalavriattıń kúndizgi, sırtqı, keshki hám aralıqtan oqıtıw formalarında ulıwma 13 mıńǵa shamalas student, magistratura qánigeliklerinde 400 den aslam magistrant oqıp atır.

Olar ushın institutta ulıwma 7350 orınǵa mólsherlengen 9 oqıw imaratı hám Ellikqala rayonında bir fakultet, 2393 orınlıq studentler turaq jayları, jańadan qurıp pitkerilgen 300 orınlıq futbol stadionı, 100 orınlıq basketbol hám voleybol maydanshası, sport sarayı hám sport kompleksi, 2 jabıq sport zalı, 2 jasalma qaplamalı mini futbol hám sırtqı sport maydanshaları xızmet kórsetpekte. Málimleme-resurs orayı fondında 180 mıńǵa shamalas ádebiyatlar orın alǵan bolıp, jańa atamadaǵı ilimiy hám oqıw ádebiyatları menen támiyinlew jumısları dawam ettirilmekte. Institutta studentlerdiń teoriyalıq bilimlerin ámeliyatta bekkemlew maqsetinde biologiya, ximiya hám fizika tálim baǵdarları boyınsha oqıw laboratoriyaları, texnologiyalıq tálim baǵdarı boyınsha oqıw-ustaxanaları jumıs alıp barmaqta.

Ózbekstan Respublikası Prezidentiniń bilimlendiriw tarawında izbe-izlik hám úziliksizlikti támiyinlew, ilim hám ámeliyattıń úylesimliligin kúsheytiw, sonday-aq, xalıqaralıq tájiriybe tiykarında oqıw baǵdarlamaların modernizaciyalaw maqsetinde qabıl etilgen «Pedagog kadrlar tayarlaw sistemasın bunnan bılay da jetilistiriw ilajları haqqında»ǵı pármanı tiykarında respublikadaǵı 13 pedagogikalıq joqarı oqıw ornı, sonıń ishinde, Ájiniyaz atındaǵı Nókis mámleketlik pedagogikalıq institutı da Mektepke shekemgi hám mektep bilimlendiriwi sistemasına ótkerildi.

Usı tiykarda instituttıń jańa shólkemlestiriw strukturası tastıyıqlandı. Oǵan bola, institutta ulıwma fakultetler hám kafedralar optimallastırılıp, 7 fakultet hám olardıń quramındaǵı 26 kafedra qayta shólkemlestirildi. Sonday-aq, xalıqaralıq birge islesiw boyınsha prorektor lawazımın engiziw boyınsha jumıslar alıp barılmaqta.

Pármanǵa muwapıq, pedagogikalıq bilimlendiriw tarawınıń oqıw baǵdarlamaların xalıqaralıq bilimlendiriw baǵdarlamalarına sáykes túrde jetilistiriw belgilengen edi. Usı wazıypalardan kelip shıǵıp institutta oqıw reje hám oqıw baǵdarlamaları Milliy qánigelik ramkası, bilimlendiriwdiń xalıqaralıq standart klassifikatorı (MSKO-2011) hám xalıqaralıq bahalaw baǵdarlamaları (PISA, TIMSS, PIRLS, TALIS) talapları tiykarında islep shıǵıldı.

Sonday-aq, bıyılǵı oqıw jılında instituttıń 2- hám 3-kurs bakalavr tálim baǵdarları jáne magistratura qánigelikleriniń oqıw reje hám baǵdarlamaları «TOP-300»lik reytingdegi sırt el joqarı oqıw orınlarınıń rejelerine sáykes etip islep shıǵıldı. Olar arasında Qazaqstan Respublikasınıń Ál-Farabiy atındaǵı Qazaq milliy universiteti, L.N.Gumilyov atındaǵı Evraziya milliy universiteti, Rossiya Federaciyasınıń Lomonosov atındaǵı Moskva mámleketlik universiteti, Qazan federal universiteti hám Bauman atındaǵı Moskva mámleketlik texnika universiteti, Túrkiyanıń Jaqın Shıǵıs texnika universiteti jáne Avstraliyanıń Sidney universiteti bar. Bul arqalı institutta bilimlendiriw sapasın arttırıw hám xalıqaralıq kólemde básekige shıdamlı kadrlar tayarlaw baslı maqset etip belgilengen.

Házirgi waqıtta institutta 560 tan aslam tájiriybeli professor-oqıtıwshılar jumıs islep atırǵan bolıp, jańa oqıw jılında ilimiy-innovaciyalıq baǵdardaǵı jumıslardı jetilistiriwge ayrıqsha dıqqat qaratılmaqta. Jıl juwmaǵına shekem ilimiy dárejelilik kórsetkishin 43,5 procentten 50 procentke jetkeriw, professor-oqıtıwshılardıń qánigeligin jetilistirip barıw, xalıqaralıq birge islesiwdiń nátiyjeliligin bunnan bılay da arttırıw, ilimiy-innovaciyalıq jumıslardı xalıqaralıq grantlar hám fondlar esabınan qarjılandırıw ushın anıq maqsetler belgilengen.

Sonıń menen birge, institutta jańa oqıw jılı dawamında student-jaslar arasında salamat ruwxıy ortalıqtı qáliplestiriw, olardıń bos waqıtların mazmunlı shólkemlestiriw, ásirese, kitapqumarlıq, intellektual ilajlar, sonday-aq, sport-sawallandırıw jarısların turaqlı shólkemlestiriw arqalı jaslardıń dóretiwshilik qábiletin rawajlandırıw, olar arasında salamat turmıs tárizin úgit-násiyatlaw, keleshek iyelerin watanǵa bolǵan muhabbat hám sadıqlıq ruwxında tárbiyalaw boyınsha ámelge asırılatuǵın jumıslar belgilep alındı.

Baspasóz konferenciyasında ǵalaba xabar quralları wákilleri, jurnalistler hám blogerler ózlerin qızıqtırǵan sorawlarǵa juwapkerlerden tolıq juwaplar aldı. Sonday-aq, jańa oqıw jılı dawamında ámelge asırılatuǵın jumıslardı keń jámiyetshilikke óz waqtında jetkerip beriw baǵdarında birge islesiwdi ele de jetilistiriw boyınsha pikir-usınısların bildirdi.

Ájiniyaz atındaǵı Nókis mámleketlik pedagogikalıq institutı baspasóz xızmeti.